भूकम्पमा सहयोग गरेकोमा धन्यवाद दिँदै वेल्समा नेपालीले बनाइदिए बाटो

वेल्स । नेपालमा गएको महाभूकम्पमा वेल्सबासीबाट प्राप्त सहयोगका लागि धन्यवाद दिन नेपालीहरुले युकेको वेल्समा पैदलयात्रीका लागि बाटो बनाइदिएका छन् । स्थानीय नेपालीहरुको सो कार्यले हालै युकेको राष्ट्रिय निकुञ्ज स्वयंसेवी पुरस्कार पनि हात पारेको छ ।
सो कार्यका लागि वेल्सवासी नेपालीहरुले नेपलिज कम्युनिटी फुटपाथ ग्रुप बनाएका थिए । ब्रेकनदेखि फेनीफाच जाने पैदलयात्रामा पर्ने सो बाटो बनाउन उनीहरुलाई करिब छ महिना लागेको थियो । सो खण्डलाई गत सेप्टेम्बरमा ‘गुर्खा पाथ’ नामकरण गरिएको छ ।
गोरखा सैनिकहरु कार्यरत कम्पनी मण्डले सन् १९७४ देखि वेल्सको ब्रेकनमा अवस्थित छ । गोरखाहरुलाई सन् १९८५ मा सो शहरको मानार्थ नागरिकको मान्यता दिइएको थियो ।

नेपालमा भूकम्प गएपछि ब्रेकनमा रहेका गोरखा र उनका परिवारहरुले स्थानीयबासीहरुसित कपडा, ब्लांकेट, त्रिपाल, खानेकुरा संकलन गरी नेपाल पठाएका थिए । ब्रेकन नेपाली समाजका स्वयंसेवा संयोजक रिटायर्ड मेजर गुप्तमान गुरुङ (एमबीई) नेपाली समुदायले गरेको कठिन कार्यका लागि पुरस्कृत गरिएकोमा हर्ष लागको बताए । “हामीले यो योजना स्थानीय समाजमा अन्तरघुलन हुन सहयोग गर्ने उद्देश्यले शुरु गरेका थियौँ र यस्तो सम्मान र पुरस्कार पाइएला भनेर सोचेका पनि थिएनौ”, उनले भने ।

“मलाई विश्वास छ, अहिले पूरै नेपाली समाज खुशीले गदगद छ र यसले भविष्यमा अरु राम्रा र ठूला कार्य गर्न प्रोत्साहन गर्ने छ”, उनले थपे ।

टेलिभिजन कार्यक्रम कन्ट्री फाइलकी पूर्व प्रस्तोता जुलिया ब्राडवरी (जो सो अवार्डको निर्णायक पनि थिइन्) ले अस्क खोलाको आडमा पर्ने सो पैदल यात्रा मार्ग ब्रेकन नेपाली समाजले पुनस्थापित गरिदिएर स्थानीयबासी र पर्यटकहरुलाई सो क्षेत्रमा पुग्नसक्ने बनाइदिएको बताइन् । बहुसाँस्कृतिक समाजले पर्यावरणको ब्यवस्थापन र सबैलाई हित पुग्नेगरी गरेको यो कार्य उत्साजनक उदाहरण भएको उनले थपिन् । उनले भनिन्, “मलाई थाहा छ कि जो कार्य यहाँ गोरखाहरुले गरेका छन् त्यो असाध्यै शानदार छ भन्नेमा धेरै सहमत छन् ।”