मुस्ताङका पूर्वराजा जिग्मेदोर्जे पल्बर विष्टको निधनपछि पार्थिक शरिरलाई बौद्धस्थित मुस्ताङ गुम्बामा राखिँदै । तस्बिर ः रोशन सापकोटा, रासस
मुस्ताङ, १ पुस । उपचारका क्रममा गए राति निधन हुनुभएका पूर्वमुस्ताङी राजा जिम्मे परवल विष्टको अन्येष्टि आगामी सोमबार मात्र हुने भएको छ ।
युरिक एसिड र उच्च रक्तचापबाट लामो समयदेखि पीडित विष्ट पछिल्लो समय निमोनिया र रुघाखोकीबाट ग्रसित बन्नुभएको थियो । काठमाडाँैको चाबहिलस्थित ओम अस्पतालमा उपचारत विष्टको ८५ वर्षको उमेरमा निधन भएको थियो ।
लोमान्थाङलगायत उपल्लो मुस्ताङ, पोखराबाट उनका आफन्तले अन्तिम श्रद्धाञ्जलि दिने र दर्शन गर्ने चाहना राखेका कारण उनको अन्येष्टि लम्बिएको पूर्वराजदरबारका सल्लाहकार इन्द्रधारा विष्टले जानकारी दिनुभयो । “आइतबार बौद्धधर्ममा खासै राम्रो बार मानिँदैन, त्यसैले सोमबार बौद्ध धर्मअनुसार उहाँको अन्येष्टि हुनेछ”, उहाँले भन्नुभयो ।
विसं २०६२, ०६३ को जनआन्दोलनसम्म उपल्लो मुस्ताङको शासन सत्तामा शक्तिशाली रहँदै पूर्वराजा विष्ट त्यसयता भने निष्क्रिय हुनुहुन्थ्यो । आधा नेपाली र आधा तिब्बती भाषा बोल्ने पूर्वराजा विष्ट जनताका समस्या सुनेर निर्णय लिने, कम बोल्ने, असहाय, गरिब तथा वृद्धवृद्धालाई सम्मान गर्ने बानीका कारण उपल्लो मुस्ताङमा अझै लोकप्रिय हुनुहुन्थ्यो ।
“धेरै जनता आउन चाहेकाले पनि हामीले अन्येष्टि कार्यक्रम केही ढिला गर्न लागेका हौँ”, सल्लाहकार विष्टले भन्नुभयो । काठमाडाँैको बौद्धमा उहाँसँगै पूर्वरानी सिटोल परवल विष्ट, पूर्वराजकुमार जिग्मे सिङ्गी परबल विष्ट अशोक, पूर्वराजकुमारी र नातानातिनी बस्दै आउनुभएको थियो ।
