लन्डन । नोभेम्बर अन्तिम साता बेलायतस्थित नेपाली मोडलहरु क्याटवाकमा उत्रंदा कोरियोग्राफर बिना राईको सबैले तारिफ गरे । बेलायतका नेपाली ब्युटीसियनहरुको संस्था ‘प्रोफेशनल ब्युटी असोसिएसन यूके’ ले अल्डरसटस्थित दि प्यालेसमा फेसन शो गरेको थियो, जसमा ६ जना मोडल विभिन्न सिक्वेन्समा सामेल थिए । ‘बेलायतमा त्यति व्यवसायिक ढंगले फेशन शो होला भन्ने मेरो कल्पना बाहिर थियो’, ब्युटीसियन, मेकअप आर्टिष्ट, मोडल र कोरियोग्राफर बिनाले भनिन्,
‘बेलायतमा समेत मोडलिङ र फेशनमा भइरहेको व्यवसायिक
प्रगतिको एउटा उदाहरण थियो त्यो ।’ त्यतिबेला आकर्षण बुटिकको विभिन्न पहिरनमा थिए मोडलहरु । नेपाल छंदा उनले धेरै रयाम्प मोडलिङ गरेकाले पनि कोरियोग्राफी जिम्मा सहज भएको बिनाले सम्झिइन् ।
यतिखेर आफ्नो परिचयको दायरा फराकिलो हुंदै गएकामा मख्ख छिन् बिना । विगत १५ वर्षदेखि बेलायत बस्दै आएकी बिनाको खास पेशा सौन्दर्य हो । अरुलाई सुन्दर बनाउने जिम्मा लिएकी उनी आफैं पनि कम सुन्दरी छैनन् । ‘अरुले तिमी राम्री भनेर कम्प्लीमेन्टस दिंदा खुशी लाग्छ’, उनी भन्दै थिइन् ।
सन् २०१२ देखि सौन्दर्य व्यवसायमा आवद्ध छिन् उनी । उनको बेलायतस्थित फोकस्टन केन्टमा आफ्नै क्रिस्टल हेयर एण्ड ब्युटी स्टुडियो छ । सौन्दर्य व्यवसायमा चुनौती देख्छिन् उनी । आफूलाई अपडेट राखिराख्नुपर्ने, नयां कोर्स लिइ रहनुपर्ने र बेलायती ग्राहकको चित्त बुझाउनुपर्ने जिम्मेवारी कम सहज होइन । तरपनि आफ्नो ‘प्यासन’ भएकाले यसैमा रमाइरहेको उनले सुनाइन् ।
खोटांग जन्म घर भएकी बिना ब्रिटिश गोर्खा परिवारकी छोरी हुन् । उनले भर्खर लोकप्रिय गायक उदितनारायण झाले गाएको झरी सरी…बोलको गीतमा निर्मित म्यूजिक भिडियोमा अभिनय गरेकी छन् भने पूर्वेली राईहरुको चन्डी गीत ब्युटीफूल कान्छी…मा समेत उनलाई देखिन्छ । मेकअप आर्टिष्टको हैसियतमा उनले धेरै इभेन्ट्स गरेकी छन् ।
सानै देखि कलामा रुची थियो उनलाई । राम्रो सिनेमामा अफर आए अभिनय गर्ने इच्छा रहेको उनले बताइन् ।
यूके लाइफ अति व्यस्त छ । यस्तो चटारोमा लभ गर्ने फूर्सद नै भएन रे उनलाई । ‘माया बिना संसार अधुरो छ’, उनी भन्छिन्, ‘तर, मैले त्यो अनुभूति गर्न पाइन । सायद उचित समय आएपछि होला ।’
बेलायती खुल्ला परिवेशमा लामो समयदेखि घुलमिल भएपनि बिहे अघि सेक्स सम्वन्ध राम्रो मान्दिनन् उनी । ‘यो व्यक्तिको इच्छामा भर पर्ने कुरा हो’, उनले भनिन्, ‘म चाहिं यसबाट टाढै छु ।’
तस्विर सौजन्यः अमर राई
