सफारीमा प्रदर्शन हुंदै पहिलो एनिमेटेड फिल्म

लन्डन । नेपालको पहिलो एनिमेटेड फिल्म शंखधरया बाखं (दि लिजेन्ड अफ शंखधर) लन्डनस्थित सफारी सिनेमा हलमा प्रदर्शन हुने भएको छ । पासा पुच गुठी यूकेले फिल्मको ग्लोबल प्रिमियरका क्रममा लन्डनमा आगामी ११ डिसेम्बर आइतबार दिउसो फिल्म देखाउन लागेको हो । यसअघि उक्त फिल्म नेपाल सम्वत ११३७ का अवसरमा लन्डन 
ग्रीनफोर्ड टाउन हलमा प्राइभेट भ्यूइङ गरिएको थियो । फिल्म अमेरिकामा ११ डिसेम्बरकै दिन र नेपालमा १७ डिसेम्बरमा प्रदर्शन गरिने आयोजकले जनाएका छन् ।

२० अक्टोबर, ८७९ एडीमा नेपाल सम्वत शुरु गर्ने र गरिबहरुको ऋण मोचन गरिदिने शंखधर साख्वामा फिल्म आधारित छ । 
अंग्रेजी सबटाइटलसहित नेपाल भाषा र नेपाली भाषामा बनेको उक्त फिल्मले नेवारी कला संस्कृतिलाई जगेर्ना गरेको प्रयास समेत गरेको छ । उक्त फिल्म यन्त्रकला ब्यानरमा निर्माण भएको हो । फिल्म निर्देशन, एनिमेसन र लेखन संयुक्त श्रेष्ठ, अन्जना श्रेष्ठ र नियुक्त श्रेष्ठले गरेका छन् । संगीत विश्व शाही र गंगा थापाको छ ।