६० वर्षीय पूर्व गोरखा सैनिकलाई मुखमा मुक्का

 

लण्डन । भूतपूर्व गोरखा सैनिक लोकेन्द्र लिम्बु बेलायतको नटिघममा कुटिएका छन् ।
६० वर्षीय लिम्बुलाई दौड्न गएको बखत तीन जनाको समूहले क्लिफटन क्षेत्रको फेरहम ब्रुकमा बुधबार दिउँसो कुटपिट गरेको बेलायती रक्षा मन्त्रालयद्वारा संचालित फोर्सेस टिभीले जनाएको छ ।
दौड्दै गरेको बेला तीन जनाको समूहले उनलाई रोकेको थियो । त्यसमध्ये एक जनाले सावेल बोकेको र अर्कोले उनलाई घचेटेको लिम्बुले बताएका छन् । “दोस्रो मान्छेले सावेल बोकेको थियो । उसले साबेल उठायो । म डरले सावेलमा हेरिरहेँ । यत्तिबेलै उसले मलाई अनुहार र मुखैमुखमा मुक्का हान्यो । म ढलेँ”, उनले भने ।
कुटाइ खाएपछि केही समय बेहोस समेत भएका लिम्बुले शुरुमा यो घटना परिवारका कसैलाई भनेका थिएनन् ।
घटना थाहा पाएपछि उनलाई छोरीले अस्पताल लगेकी थिइन् ।
छोरी तेजा लिम्बु भन्छिन्, “यो देशको लागि सेवा गरेका र ६० वर्ष पुगिसकेको मान्छेलाई कुनै कारणबिना बेहोस हुने गरी कुटिइँदा छक्क परेको छु ।”
“मेरा बाबा पूर्व सैनिक हो । जसले यो देशको सेवा गर्यो र सधैँ यो देशको कानुनलाई पालना गर्दै आयो । यो सारै दुःखलाग्दो घटना हो र म सारै डराएको छु । मैले कहिल्यै सोचेको थिइनँ कि यो देशलाई सुरक्षा र सेवा गरिरहेका बेला ६० वर्षको उमेरमा उहाँमाथिक कसैले आक्रमण गर्छ भनेर”, छोरी तेजा लिम्बुले भनिन् ।

उनले फकल्याण्डको लडाइँ लडेका थिए । उनले १५ वर्ष गोरखा रेजिमेण्टमा रही बेलायतको सेवा गरेका थिए ।
घटनाका बारेमा नटिघमसायर प्रहरीले अनुसन्धान गर्दै गरेको बताइएको छ ।

बीबीसीसित उनले यसरी अाक्रमण भएको बताए