पत्रकार सम्मेलनपछि सामूहिक तस्विर खिचाइंदै
लण्डन । मुलुकको विकासका लागि आर्थिक क्रान्तिको नारा दिएर नयाँ शक्ति नेपाल नामक पार्टी गठन गरेका डा. बाबुराम भट्टराईको युकेस्थित पत्रकार सम्मेलनमा खानाका लागि पत्रकारहरुसित पैसा उठाइएको छ । शुक्रबार युके आइपुगेका डा. भट्टराईको पत्रकार सम्मेलन लण्डनस्थित मोन्टिज रेष्टुरेन्टमा आयोजना गरिएको थियो ।
सो पत्रकार सम्मेलनमा गेष्ट र पत्रकारहरुको लञ्चका लागि भन्दै पत्रकारहरुसितै जनही १० पाउण्ड उठाइएको थियो । सो पत्रकार सम्मेलनमा उपस्थित भइदिन नयाँ शक्ति नेपालको युकेस्थित भातृ संगठन इन्टरन्यानशल नेपलिज सोसाइटी (आइएनएस) ले पत्रकारहरुलाई निमन्त्रणा गरेको थियो । निमन्त्रणामा भने लञ्चका लागि पैसा तिर्नुपर्ने अग्रिम सूचना दिइएको थिएन । पत्रकार सम्मेलनमा पुगेका एक पत्रकारले भने, “लञ्च खाने बेलामा कसैले पनि लञ्चका लागि पैसा तिनुपर्छ भनेनन् । कार्यक्रम सकेर निस्कने बेलामा गेटमा बसेका आयोजकले ‘लञ्चको पैसा हजुर’ भनेपछि प्रतिवाद गर्न पनि मन लागेन । खुरु खुरु पैसा तिरेर निस्किएँ ।” यसरी पैसा उठाइएका पत्रकारहरुमा नेपाल पत्रकार महासंघ युकेका उपाध्यक्ष, सभासदहरुसमेत छन् ।
नेपाल पत्रकार महासंघ युकेका अध्यक्ष नरेश खपाङ्गीमगरले सो घटनाबारे पत्रकार सम्मेलनका आयोजक संस्थाका अध्यक्ष भोला खनालको ध्यानाकर्षण गराएको बताएका छन् । यसबारे खनालले खपाङ्गीसंग भनेका छन्, ‘असमझदारीका कारण पत्रकारहरुसित पनि पैसा उठाइयो होला । यसमा भएको कमी स्वीकार गर्दछु र भविष्यमा यस्ता घटना हुन नदिन र पत्रकारहरुसित कसरी व्यवहार गर्ने भन्ने बारेमा तपाईहरु (महासंघ) सितै सल्लाह गरेर अघि बढ्ने छु ।’
