सोमबार, कार्तिक १० २०७७ | Mon, October 26, 2020
नेपालको समय: १५:१८ | UK Time: 09:33

लन्डनमा पहिलो नेपाली एनिमेटेड फिल्म प्रदर्शन

वीनेपाली
२०७३ कार्तिक २१ गते १२:१८

sankhadhar-film
लन्डन । राष्ट्रिय विभूति शंखधर साख्वाले विसं ९३७ (इ सं ८८०) मा गरिब जनताको ऋण मोचन गरी नेपाल संवत शुरुवात गराएका थिए । तिनै विभूतिमा आधारित फिल्म पहिलो नेपाली एनिमेटेड फिल्म ‘द लिजेन्ड अफ शंखधर’ को लन्डनमा विशेष प्रिमियर शो गरिएको छ । पासा पुचः गुठी यूकेले गत सोमबार ३१ अक्टोबर बिहान ग्रीनफोर्ड टाउन हलमा फिल्म प्रदर्शन गरिएको हो । पासा पुचः गुठीका संस्थापक सदस्यहरु वालमुकुन्द प्रसाद जोशी, महन्तबहादुर श्रेष्ठ, अर्जुन प्रधान र शशीधर मानन्धरले कार्यक्रम 
उद्घाटन गरेका थिए ।

उक्त फिल्म सर्वसाधारणका लागि ११ डिसेम्बर, २०१६ मा यूके र अमेरिका तथा १७ डिसेम्बर, २०१६ मा नेपालमा देखाइने भएको छ ।

कार्यक्रममा बोर्ड अफ ट्रष्टी अध्यक्ष महन्तबहादुर श्रेष्ठ र संस्थापक सदस्य बालमुकुन्द जोशीले शंखधरले नेपाल संवत शुरुवात गरेको जनाउंदै त्यही इतिहास प्रतिबिम्बित गर्ने फिल्मको प्रचारप्रसारमा साथ दिनुपर्ने बताए । पासा पुचः गुठी लन्डनकी महासचिव त्रिवेणी गुरुङले आधुनिक परिवेशमा नेपाल संवतको अर्थबारे प्रिजेन्टेसन दिएकी थिइन् । उनले नेपाल संवत नेवारहरुको मात्र हो वा अन्य गैर नेवारहरुको पनि भन्नेबारे समेत टिप्पणी गरिन् । नेपाल संवत र विक्रम संवतबीचको मतान्तरबारे पनि बताइएको थियो ।

फिल्मका निर्देशक तथा निर्माता संयुक्त श्रेष्ठले फिल्म बनाउने 
आफ्नोमात्र होइन, समस्त समुदायकै सपना साकार भएकामा खुशी व्यक्त गरे । उनले फिल्मबाट शंखधरको जीवनी र इतिहास थाहा पाइने जनाउंदै फिल्म नेपाली एनिमेसनमा नयां फड्को भएको समेत बताए ।

उक्त अवसरमा ओजेश सिंहले स्वागत मन्तव्य दिंदै न्हू दया भिन्तुनाको शुभकामना दिएका थिए । सिंहले नेपाली संस्कृतिको जगेर्ना र विकासका लागि पासा पुच गुठी लन्डनले गरेको पहलको प्रशंसा गर्दै आभार समेत व्यक्त गरे ।

बोर्ड अफ ट्रष्टी महासचिव शिवजी श्रेष्ठले कार्यक्रम समापन गर्दै सबैलाई धन्यवाद दिए ।

कार्यक्रममा पासा पुचः गुठी रेडिङ र साउथ इष्ट लन्डनका अध्यक्ष क्रमशः सुदर्शन श्रेष्ठ, सुशील प्रजापति, एनआरएनए यूके कोषाध्यक्ष दीपक श्रेष्ठ, देवेन्द्र श्रेष्ठ लगायतको उपस्थिति थियो ।

प्रतिक्रिया

सम्बन्धित सामाग्री

फेसबुक