लन्डन । रोयल बरो अफ ग्रीनिच नेप्लिज सोसाइटीले आउंदो अंग्रेजी नयाँ वर्ष २०१७ को उपलक्ष्यमा एक शुभकामना साँझ गर्ने भएको छ । गत शनिवार प्लमस्टेडमा बसेको कार्यसमितिको बैठकले उक्त निर्णय गरेको हो । अध्यक्ष कुमार श्रेष्ठको अध्यक्षतामा बसेको बैठकमा कार्यसमितिका अधिकांश सदस्य र सल्लाहकारहरुको उपस्थिति थियो ।
बैठकले उक्त शुभकामना साँझको आयोजना १ जनवरी आइतवार साँझ प्लमस्टेडको गेसो हलमा गर्ने निर्णय गरेको हो । उपाध्यक्ष हरी गोविन्द गुरुङले संयोजन गर्ने उक्त शुभकामना साँझको प्रवेश टिकटको मुल्य दश पाउण्ड तोकिएको छ भने प्रचारप्रसारको जिम्मा कोषाध्यक्ष ह्यारी गुरुङ र महासचिव खुशी लिम्बुले लिएका छन् ।
त्यसै गरी आरजीएनएसले आफ्नो प्रथम अधिवेशन आगामी २०१७ अप्रिलको दोश्रो सप्ताहन्त एसियन कम्युनिटी हलमा आयोजना गर्ने निर्णय भएको जानकारी सोसाइटीका महासचिव खुशी लिम्बुले दिए । स्मरण रहोस् लन्डनको ग्रीनिच र साउथ इस्ट क्षेत्रका सम्पूर्ण नेपालीहरुको साझा संस्थाका रुपमा २०१५ को अगस्टमा स्थापना भएको यस संस्थालाई हालसम्म तदर्थ समितिले नै सञ्चालन गर्दै आएको छ ।
