संघीय समाज युकेमा जिम्मेवारी तोकियो

लन्डन । नेपाली संघीय समाज, युकेकोे बैठक हालै सम्पन्न भएको छ । अल्डरसटस्थित एम्पायर हलमा समाजका अध्यक्ष कमल गुरूङको अध्यक्षतामा भएको बैठकमा निवर्तमान कार्यसमितिबाट सम्पूर्ण स्वामित्व ग्रहण गर्नुको साथै विभिन्न विभाग र राज्यसमिति प्रमुखहरू मनोनयन गरिएको प्रवक्ता तथा सञ्चार प्रमुख देवेन्द्र राईले जनाएका छन् ।

गत २५ सेप्टेम्बर २०१६ मा सम्पन्न दोश्रो महाधिवेशनद्वारा निर्वाचित कार्यसमितिको यो पहिलो बैठक हो । महासचिव कमल राईले सञ्चालन गरेको उक्त बैठकको पहिलो सत्रमा निवर्तमान अध्यक्ष धर्म तामाङले समाजको महत्वपूर्ण कागजातहरू अध्यक्ष कमल गुरूङलाई हस्तान्तरण गरेका थिए । तामाङले आफ्नो कार्यकालमा नेपाली जनताको हक अधिकार सुनिश्चितताको लागि पार्टीले गरेको आन्दोलनको लागि नेपाली संघीय समाज, युकेको तर्फबाट सक्दो सहयोग गरिएको धारणा राखेका थिए । नेपालको राजनीतिक परिस्थिति जटिल अवस्थामा रहेकोले अझै पनि दबावमूलक आन्दोलनको आवश्यकता रहेको उनले बताए । साथै वर्तमान कार्यसमितिको आगामी कार्य सफताको सुभकामना व्यक्त गरेका थिए ।

बैठकमा निवर्तमान महासचिव विश्वासदीप तिगेलाले महासचिव कमल राईलाई सांगठनिक कागजातहरू बुझाएका थिए भने समय अभावका कारण कोषाध्यक्षको हिसाब–किताब अर्को बैठकसम्मको लागि सारिएको छ ।

बैठकको दोश्रो सत्रमा विभिन्न विभाग प्रमुख, राज्य समिति संयोजक, सल्लाहकारहरू र कार्यसमिति विस्तार गरिएको थियो । अध्यक्ष, सहअध्यक्ष २, महासचिव, उपमहासचिव, उपाध्यक्ष १ र कोषाध्यक्ष गरी ७ जनाको सचिवालय रहने बैठकले निर्णय गरेको छ । संगठन विभाग प्रमुखमा कमल राई र विभागको उपप्रमुखहरूमा देवेन्द्र राई र इन्द्र गुरूङलाई बैठकले मनोनयन गरेको छ ।

प्रशिक्षण विभाग प्रमुखमा भगवान चाम्लिङ र उपप्रमुखहरूमा टेक बहादुर थापा ‘राजेश’, धर्म तामाङ र प्रेम कुमार राई रहेका छन् भने आर्थिक विभाग प्रमुखमा भानुभक्त राई र उपप्रमुखमा जानुका राई चयन भए । जनसम्पर्क विभाग प्रमुखमा धर्म तामाङ र उपप्रमुखमा नरेश काङमाङ राई रहेका छन् । अनुशसन विभाग प्रमुखमा बालकृष्ण राई र उपप्रमुखहरूमा पंकज बजगाई र मेजर योगेश राई छानिएका छन् । त्यसैगरि, युवा तथा सांस्कृतिक विभाग प्रमुखमा इन्द्र गुरूङ छन् भने प्रकाशन तथा सञ्चार विभाग प्रमुखमा देवेन्द्र राई र शंकर गुरूङ तथा होम सुनुवारलाई उपप्रमुखको जिम्मेवारी तोकिएको छ । त्यसै गरेर बैठकले नेपाली संघीय समाज, युकेकोे प्रवक्तामा देवेन्द्र राईलाई तोकेको छ ।

बैठकले १७ सदस्य सल्लाहकार समिति पनि गठन गरेको छ । साथै २८ सदस्य कार्यसमितिलाई विस्तार गरी ३५ सदस्यीय कार्यसमिति बनाउने निर्णय बैठकले गरेको छ । नेपालको संविधानमा संघीय राज्यको व्यवस्था भए पनि पहिचान सहितको संघीय राज्य हुनुपर्ने पार्टीको अडानलाई थप बल पुरयाउन विभिन्न राज्य संयोजकहरू बैठकले तोकेको छ । तमूवान राज्यको संयोजकमा जगत तमू, ताम्सालिङ संयोजकमा दावा स्याङ्बो, शेर्पा संयोजकमा आङदावा शेर्पा र खम्बुवान राज्य संयोजकमा भानुभक्त राई तोकिएका छन् । अन्य संघीय राज्य संयोजकहरू आगामी बैठकले निर्णय गर्ने जनाइएको छ ।

बैठकमा समाजको दोश्रो महाधिवेशनको विस्तृत समीक्षा समेत गरिएको थियो । संघीय समाजवादी फोरम, नेपालका अध्यक्ष तथा पूर्व उपप्रधानमन्त्री उपेन्द्र यादव र विदेश विभाग प्रमुख आङकाजी शेर्पाको उपस्थितिमा सम्पन्न दोश्रो महाधिवेशन भव्यरुपले सम्पन्न भएको बैठकको निष्कर्ष थियो । नेपालको वर्तमान राजनीतिक अवस्था र पार्टीको नीति तथा कार्यक्रमको बारेमा नेताद्धयको बेलायत भ्रमणले बेलायतवासी नेपालीहरू, बेलायत सरकारको विदेश विभाग र अन्तर्राष्ट्रिय मानव अधिकारवादी संस्थाहरूलाई थप जानकारी प्राप्त भएको बारेमा बैठकमा छलफल भएको थियो । बैठकमा गएको महाधिवेशनमा केही व्यवस्थापकीय कमजोरी भएको र नेतृत्व चयनमा पार्टी केन्द्रबाट हस्तक्षेप भएको भन्ने बारेमा पनि कुरा उठेको थियो । यस सम्बन्धमा केन्द्रीय सदस्य भगवान चाम्लिङले विगतको कमीकमजोरीहरू नदाहोरिन सजग भएर लाग्नु पर्ने औंल्याउदै सानामसिना समस्यामा वर्तमान नेतृत्व अल्झिन नहुने विचार राखेका थिए ।

बैठक अन्त्य गर्दै अध्यक्ष कमल गुरूङले विगतमा के भयो भन्दा पनि भविष्यमा के गर्न सकिन्छ भन्ने बारेमा आफ्नो ध्यान केन्द्रित रहेको बताए । नेपाली जनता र पार्टीको हितको लागि काम गर्न उनले सबैलाई आब्हान गरे ।