पूर्व उपप्रधानमन्त्री थापा लन्डनमा

लन्डन । राप्रपा नेपालका अध्यक्ष एवं पूर्व उपप्रधान तथा परराष्ट्रमन्त्री कमल थापा बुधबार राती लन्डन आइपुगेका छन् । राती करिब १०.४५ बजे हिथ्रो विमानस्थल उत्रिएका थापा निजी भ्रमणमा लन्डन आएका हुन् ।

थापालाई स्वागत गर्न राजदूत डा. दुर्गाबहादुर सुवेदी, उपनियोग प्रमुख 
शरदराज आरन, राप्रपा नेपालका केन्द्रिय सदस्य माननीय रेशम लामा, राप्रपा नेपाल निकट प्रवासी नेपाली एकता समाज यूकेका संस्थापक अध्यक्ष रोशन सापकोटा र अन्य कार्यकर्ता विमानस्थल पुगेका थिए ।

निजी भ्रमण भएपनि थापाले केही राजनीतिक भेट गर्ने अपेक्षा छ । थापासंग प्रवासी नेपाली एकता समाज यूकेले आगामी २९ अक्टोबर शनिबार लन्डनमा वृहत अन्तरक्रिया गर्ने भएको छ । उक्त कार्यक्रमको स्थान भने तय भइसकेको छैन् ।

थापाका छोरी ज्वाईं लन्डनमा छन् । उनी लन्डनबाट भेट्रानतर्फ टेनिस प्रतियोगितामा भाग लिन पोर्चुगल जाने जनाइएको छ ।