हैटीमा म्याथुबाट मृत्यु हुनेको सङ्ख्या ३०० पुग्यो

पोर्ट ओ प्रिन्स (हैटी), २० असोज । हैटीमा करिब एक दशक यताकै शक्तिशाली आँधीका कारण मृत्यु हुनेको सङ्ख्या बिहीबार ३०० पुगेको छ ।

यस प्रकोपको कारण दशौं हजार मानिस विस्थाापित भएका छन् । विश्वकै गरिब मुलुकमध्येको एक राष्ट्र हैटीको पश्चिमी क्षेत्रमा अघि बढेको उक्त म्याथु नामक आँधी क्रमशः पूर्वी क्युबातिर बढिरहेको बताइएको छ ।

आँधीका कारण हैटीको राजधानी पोर्ट ओ प्रिन्सलाई जोड्ने पुल भत्किएपछि यहाँको स्थिति भयावह बनेको यहाँको गृह मन्त्रालयद्वारा जारी एक विज्ञप्तिमा जनाइएको छ ।

आँधीपछि विस्थापित बनेका नागरिकलाई विद्यालय, चर्चलगायतका सार्वजनिक ठाउँमा राखिएको छ । आँधीका कारण यहाँका विद्यालयमा सोमबारसम्मका लागि पठनपाठन बन्द गरिएको छ ।

आँधीका कारण हैटीका विभिन्न क्षेत्रमा ठूलो सङ्ख्यामा घर भत्किएका, रुखहरू ढल्दा यातायात आवतजावतमा कठिनाई भएको र कतिपय सहरी तथा ग्रामीण वस्ती जलमग्न भएको मन्त्रालयले जनाएको छ ।

घटनाबाट भएको क्षतिकाबारे यहाँको गृह मन्त्रालयको समन्वयमा विवरण सङ्कलन भइरहेको जनाइएको छ ।

आगामी आइतबार गरिने भनिएको राष्ट्रपतीय तथा संसदीय निर्वाचन आँधीपछि स्थगित हुने वा नहुने सम्बन्धमा सरकारी अधिकारीले अझै निर्णय भइनसकेको बताएका छन् ।

यसैबीच आँधीबाट करिब पाँच मिटरसम्मको अग्लो तरङ्ग सिर्जना गर्दै क्युबाको पूर्वी भागतिर गएपछि क्युबाले आफ्ना करिब १३ लाख नागरिकलाई सुरक्षित स्थलतर्फ सारेको छ ।

क्युबामा आँधीका कारण भएको पूर्णक्षतिको बारेमा विवरण आइनसकेको क्युबाली अधिकारीले जनाएका छन् । उक्त आँधी क्रमशः अमेरिकी राज्य दक्षिण फ्लोरिडा, उत्तरी क्यारोलिना, जर्जियातिर अघि बढेको बताइएको छ ।

आँधीका कारण अमेरिकी राष्ट्रपति बाराक ओबामाले फ्लोरिडामा आफ्नो पार्टीको तर्फबाट राष्ट्रपतिका उम्मेदवार हिलारी क्लिन्टनको समर्थनमा चुनावी सम्बोधन गर्न तय गरिएको कार्यक्रम तत्कालका लागि रद्द भएको बताइएको छ ।

दक्षिणी क्यारोलिनाबाट करिब ११ लाख मानिसलाई तटीय क्षेत्रबाट सुरक्षित स्थलतर्फ सार्ने तयारी गरेको छ । आँधी म्याथु शुक्रबारसम्म सक्रिय रहने यहाँ मौसम विभागले जानकारी दिएको छ ।