हिमालयको काठमाडौँ–कोलम्बो उडान सुरु

काठमाडौँ, १५ असोज । निजी क्षेत्रको वायुसेवा प्रदायक कम्पनी हिमालय एयरलाइन्सले आजदेखि काठमाडौँ– कोलम्बो (श्रीलङ्का) को सिधा उडान सुरु गरेको छ ।

कतारको दोहा दैनिक उडान भर्दै आएको हिमालयले दोस्रो गन्तव्यका रुपमा कोलम्बो उडान भरेको हो ।

हिमालय एयरलाइन्सको एयरबस ३२० सिरिजको नाइन एन एएलएएन कलसाइन भएको जहाजले बिहान ११ः३० बजे ३१ यात्रु बोकेर कोलम्बो गएको हिमालय एयरलाइन्सका वाणिज्य महाप्रबन्धक राजु केसीले राससलाई जानकारी दिनुभयो ।

उहाँका अनुसार आजै फर्कने उक्त जहाजले कोलम्बोबाट १०२ यात्रु लिएर फर्कनेछ । सुरुको उडान भएकाले आज थोरै यात्रु भए पनि विस्तारै यात्रु सङ्ख्या बढ्ने महाप्रबन्धक केसीले बताउनुभयो ।

श्रीलङ्काबाट बढी पर्यटक भित्र्याउने लक्ष्यसहित हिमालयले सेवा सुरु गरेको जनाएको छ । हिमालयले हप्ताको तीन दिन प्रत्येक मङ्गलबार, बिहीबार र शनिबार कोलम्बोमा उडान भर्नेछ । उडान तालिका अनुसार त्रिभुवन अन्तर्राष्ट्रिय विमानस्थलबाट ११.३० बजे उड्ने र दिउँसो ३.१५ बजे कोलम्बोमा अवतरण हुनेछ भने अपराह्न ४.१५ मा कोलम्बोबाट उडेर बेलुकी ८.१५ बजे काठमाडौँ आइपुग्नेछ ।

सन् २०१६ भित्रै पाँच गन्तव्यमा उडान भर्ने तयारी गरेको एयरलाइन्सले भारतको नयाँदिल्ली, साउदी अरबको दमाम र बर्मामा पनि उडान सुरु गर्नेछ भने अर्को वर्ष चीनका विभिन्न गन्तव्यमा उडान भर्ने जनाएको छ ।

हाल १५८ सिट क्षमताको एक मात्र एयरबस रहेको हिमालयले आगामी अक्टोबरभित्र थप अर्को एयर बस भित्र्याइ नयाँ गन्तव्यमा उडान भर्ने जनाएको छ ।