भदौमा महिला हिंसाका ९५ घटना

काठमाडौँ, १४ असोज । भदौ महिनामा हिंसामा परेका महिलामध्ये ५४ प्रतिशत महिला १७ देखि ३० वर्ष उमेर समूहका रहेका छन् ।

महिला पुनःस्थापना केन्द्र (ओरेक)ले भदौ महिनामा गरेको अध्ययनअनुसार ९५ वटा हिंसामा परेका घटना दर्ता भएकामा ४६ प्रतिशत १६ वर्षमुनिका देखिएको छ ।

यसैगरी, ३९ प्रतिशत महिला शारीरिक हिंसामा परेका थिए भने मानसिक हिंसामा २४ प्रतिशत, बलात्कारको घटना १० प्रतिशत, बहुविवाहको घटना आठ प्रतिशत र अन्य घटना १३ प्रतिशत महिला हिंसामा परेको देखिएको छ । उनीहरुमध्ये ३१ प्रतिशत महिला आफ्नै परिवारबाट पीडित भएका थिए भने २३ प्रतिशत छिमेकी तथा नातेदारबाट हिंसामा परेका थिए ।

यस्तै, १५ प्रतिशत आफ्नै श्रीमान्बाट र आठ प्रतिशत प्रेमीबाट हिंसामा परेका थिए । महिला हिंसाविरुद्व विभिन्न सङ्घसंस्थाले समय–समयमा जनचेतनात्मक कार्यक्रम, रयाली, सडक नाटकजस्ता कार्यक्रम गरेपनि महिलामाथि हुने हिंसाका घटनामा कमी आउन नसकेको उक्त तथ्याङ्कले देखाएको छ ।