तस्विरः बीबीसी
लन्डन । मोबाइलप्रेमी चालकहरुलाई एउटा अप्रिय खबर छ । बेलायत सरकारले मोबाइल चलाएर गाडी हांकेको भेटिए चालकलाई दोब्बर जरिवाना र लाइसेन्समा ६ पोइन्ट दिने तयारी गरेको छ । दि डिपार्टमेन्ट फर ट्रान्सपोर्टले आउंदो वर्ष ल्याउने अपेक्षा गरिएको उक्त कडा नियमले २०० पाउण्डसम्म जरिवाना लगाउने बीबीसीले शुक्रबार जनाएको छ । नयां चालकले मोबाइल चलाएको भेटिए पुनः परीक्षा दिनुपर्ने नियम बनाइंदैछ ।
मोबाइलकै कारण दुर्घटनामा वृद्धि भएपछि यस्तो नियम ल्याउन लागिएको हो ।
यसै साताको शुरुतिर गरिएको एउटा सर्वेक्षणमा एकतिहाइ यूके मोटरिष्टहरुले सवारी साधन हांकेका बेला फोनमा कुरा गर्ने, टेक्स्ट गर्ने वा एप चलाउने गरेको देखाएको थियो । प्रश्न सोधिएका १७ सय जनामध्ये आधा जसोले त सवारी साधन चलाउंदा फिल्म र फोटो खिच्ने गरेको बताएका थिए ।
डिपार्टमेन्ट फर ट्रान्सपोर्टको तथ्यांकमा सन् २०१४ मा बेलायतमा मोबाइल चलाएर ध्यान अन्यत्र मोडिंदा ४९२ दुर्घटना भए जसमा २१ मृत्यु र ८४ गम्भीर प्रकृतिका थिए ।
