चीनको छेन्दु नगरपालिकाले शान्ति मण्डला निर्माण गर्ने

काठमाडौँ, २३ साउन । ‘तीनकुने शान्ति मण्डला’ निर्माणको काम चीनको छेन्दु नगरपालिकाले गर्ने भएको छ ।

नगरलाई थप सुन्दर, हरियाली र आन्तरिक तथा बाह्य पर्यटक आकर्षित गर्ने उद्देश्यले तीनकुनेमा शान्ति मण्डला बनाउन लागिएको काठमाडाँै महानगरपालिकाका प्रवक्ता ज्ञानेन्द्र कार्कीले जानकारी दिनुभयो ।

कार्कीका अनुसार छेन्दु नगपालिकाका मेयरले कुनै एउटा परियोजनामा लगानी गर्ने चासो देखाएपछि कामपाले उक्त मण्डला निर्माणको जिम्मा दिन तयार भएको हो । निर्माणकै लागि बाँकी छलफल गर्न केही दिनमा कामपाको प्रतिनिधि सम्मिलित एक टोली चीन जाने तयारी गरेको छ ।

कामपाका अनुसार हाल नक्साङ्कनको काम र निर्माणको लागि करिब रु एक अर्ब २३ करोड ४६ लाख ७५ हजार खर्च लाग्ने अनुमानित प्रतिवेदनसमेत सार्वजनिक भइसकेको छ ।

आगामी पाँच वर्षभित्र बनाइसक्ने योजनाअनुरुप प्रक्रिया सुरु गरिएको छ । शान्तिमण्डलाको बीच भागमा १६ मि अग्लो बुद्धको विशाल मूर्ति हुनेछ । सो मण्डलाको संरचना हिन्दू र बौद्ध धर्मलाई समायोजन गरी तयार गर्ने बताइएको छ । मण्डलाको प्रत्येक कुनामा हिन्दू धर्मको प्रतिनिधित्व हुने गरी ब्रह्मा, विष्णु र महेश्वरका मूर्ति राखिनेछ ।

त्यस्तै मूर्तिको वरिपरि रूख–बिरुवा रोपिने बताइएको छ । संरचनाको तीनवटै कोणमा चौबिसै घन्टा पानी आउने ‘फाउन्टेन’ निर्माणको गर्ने योजना छ ।

करिब ५१ रोपनी क्षेत्रफलमा निर्माण हुन लागेको उक्त उद्यानभित्र एकैपटक २०० जनाले योग गर्न सक्ने योग कक्षसमेत निर्माण गरिनेछ ।