ग्रीनवीच वर्ल्ड कल्चरल फेस्टिभलमा नेपाली कला संस्कृति

लन्डन । आइतबार एल्थाम प्यालेसमा आयोजित ग्रीनवीच वर्ल्ड कल्चरल फेस्टिभलमा नेपाली कला संस्कृतिले प्राथमिकता पाएको छ । स्किल्स् एण्ड केयर परफर्मिङ आर्टस् सेन्टरबाट नेपालको प्रतिनिधित्व गर्दै नेपाली कला संस्कृति झल्कने चारवटा नृत्य प्रस्तुत गरिएको हो ।
उक्त अवसरमा १२ जना बालबालिकाले तीनवटा सामूहिक नृत्य देखाए । नृत्य प्रशिक्षक एवं कोरियोग्राफर सिम्मी पुनका अनुसार, बालबालिकाले समूहगत रुपमा डांफे झैं नाच्ने हिमाल झैं हास्ने, कम्मर माथि पटुकी र हिमालले ढाक्यो कान्छा…गीतमा नाच देखाएका थिए ।
कोरियोग्राफर सिम्मी आफूले पनि मै राम्री हुन के गरुं मैले…बोलको गीतमा नाचेकी थिइन् । विभिन्न समुदाय सहभागी उक्त महोत्सवमा नेपाली कला संस्कृति देखाउन पाएकामा सिम्मी दंग छिन् ।

स्किल्स् एण्ड केयर परफर्मिङ आर्टस् को ग्रीनवीच फेस्टिबलमा तेश्रो सहभागिता हो । यसअघि उक्त संस्थाले प्लमस्टिड मेक मेरी र मुभिङ उलवीच महोत्सवमा समेत सहभागिता जनाएको थियो ।

महोत्सवमा नेपाल पर्यटन बोर्ड यूकेले पनि नेपालको पर्यटनबारे प्रचार प्रसार गरेको थियो । उक्त अवसरमा पर्यटन बोर्डका यूके प्रतिनिधि पशुपति भण्डारी, व्यवसायी यादव भण्डारी लगायतले पर्यटन प्रवर्धन र जुलाई १९ मा लर्डसमा हुन गइरहेको एमसीसी भर्सेज नेपाल क्रिकेट खेलबारे प्रचार प्रसार गरेका थिए । बोर्डका यूके प्रतिनिधि भण्डारीले नेपालको पर्यटनबारे आगन्तुकहरुलाई अवगत गराएका थिए । स्किल्स एण्ड केयरका फत्त थापा र सोनिया थापाले पनि कार्यक्रममा योगदान गरेका थिए ।

उक्त अवसरमा भूपू गोर्खाहरुले पनि आफ्नो प्रस्तुति दिए ।

ग्रीनवीच बरो काउन्सिलमा नेपालीको उल्लेख्य बसोवास छ । एक तथ्यांक अनुसार, ग्रीनवीचमा अंग्रेजी पछि बढि बोलिने भाषा नेपाली हो ।