बुधबार, कार्तिक ५ २०७७ | Wed, October 21, 2020
नेपालको समय: १८:३१ | UK Time: 13:46

एमालेले पुरानो पार्टी कार्यालय भत्काउने

वीनेपाली
२०७३ जेठ १२ गते २:१७

UML party office-ST_20140109050149

काठमाडौँ, ११ जेठ । नेकपा (एमाले)ले बल्खुस्थित पुरानो पार्टी केन्द्रीय कार्यालयको भवन भत्काउने भएको छ ।

भूकम्पपछि क्षति भएको बल्खुस्थित पुरानो पार्टीको भवन भत्काउने सचिव एव केन्द्रीय प्रचार विभाग प्रमुख योगेश भट्टराईद्वारा जारी विज्ञप्तिमा उल्लेख गरिएको छ ।

आज पार्टी सचिवालय सचिव प्रदीप ज्ञवालीको संयोजकत्वमा बसेको केन्द्रीय कार्यालय व्यवस्थापन गर्न गठित कार्यदलको बैठकले भूकम्पबाट क्षति भएको बल्खुस्थित पुरानो पार्टी कार्यालयको भवन भत्काउने निर्णय गरेको हो ।

बैठकले भवन भत्काउनका लागि बोलपत्र आह्वानसमेत गरेको छ । विज्ञप्तिमा भवनमा भएको सामग्री लैजानसमेत इच्छुक कम्पनी, संस्था र व्यक्तिलाई सार्वजनिक आह्वानसमेत गरिएको छ । यही १६ गते आइतबार साँझ ५ बजेसम्म बोलकबोलसहित आशयपत्र हालको केन्द्रीय कार्यालयमा धुम्बाराहीमा बुझाउन पनि आह्वान गरिएको छ ।

कार्यदलमा सचिव भट्टराई, आर्थिक विभाग प्रमुख विष्णु रिमाल, कार्यालय सचिव कृष्णगोपाल श्रेष्ठ र लेखा प्रमुख खेमराज पौडेल सदस्य रहनुभएको छ । बैठकले २०७२ साल वैशाख १२ र २९ गतेको भूकम्पका कारण एमालेको बल्खुस्थित केन्द्रीय कार्यालय क्षति पुगेको थियो ।

भूकम्पले क्षति पुरयाएपछि एमाले मुख्यालय अहिले धुम्बाराहीमा सरेको छ । अहिले पुरानो कार्यालयको परिसरमा सम्पर्क समन्वय कमिटी, पार्टीको मुखपत्र नवयुगको वितरण शाखा र नवयुग छापाखाना मात्र रहेका छन् । साढे चारतले भवन भूकम्पबाट क्षति भएपछि सबै सामान सारिएको थियो ।

प्रतिक्रिया

सम्बन्धित सामाग्री

फेसबुक