काठमाडौँ, ८ चैत । आपूर्तिमन्त्री गणेशमान पुनले प्रधानमन्त्री भ्रमणबाट फर्केलगत्तै चीनसँग इन्धन व्यापारसम्बन्धी सम्झौता हुने बताउनुभएको छ ।

नेपाल र चीनबीच आज भएको दशबुँदे सम्झौतापछि रासससँग कुरा गर्दै उहाँले प्रधानमन्त्री ओली र चिनियाँ प्रधानमन्त्री ली खछ्याङबीच इन्धन आयातनिर्यात सम्बन्धमा विशेष कुराकानी भएको र छिट्टै यससम्बन्धी सम्झौता गरिने विश्वास व्यक्त गर्नुभयो । आपूर्तिमन्त्रीले भन्नुभयो, “यस विषयमा प्राविधिक कुराबाहेक अरु सबै तयारी पूरा भएको छ, इन्धन व्यापारसम्बन्धी सम्झौता रोकिने कुनै कारण छैन ।”

आजै दुई देशबीच यातायात तथा पारवहन र स्वतन्त्र व्यापारसम्बन्धी लगायत सम्झौता भएका छन् ।