काठमाडौँ, ३ फागुन । दोस्रो ‘फेडेरेसन अफ इन्टरनेसनल सिनेमा टेलिभिजन अफ स्पोर्टस् (एफआइसिटीएस)’ यही फागुन १९ र २० गते हुने भएको छ ।
नेपाल स्पोर्टस् फाउन्डेसनको आयोजनामा राजधानीमा हुने खेलकुद चलचित्र महोत्सव–२०१६ मा चार स्वदेशी र तीन विदेशी चलचित्र प्रदर्शन गरिने आज यहाँ आयोजित पत्रकार सम्मेलनमा जानकारी दिइयो ।
महोत्सव अन्तर्गत नेपालसहित चार देशका खेलकुदलाई प्राथमिकतामा राखेर बनेका चलचित्र दुई दिनसम्म देखाइने छ जसमा नेपाली निर्देशक विजय गजमेरको ‘आकाश’, टिएस ठकुरी र जनक नेपालको ‘प्लेयर्स सिटी’, श्रीहरि श्रेष्ठ र आनन्दकृष्ण श्रेष्ठको ‘एन्जेल अफ रिभर प्याराडाइस’ र ‘रिसर्च फर कमन ग्राउन्ड नेपाल’ले निर्माण गरेको ‘पावर अफ बल’ छन् ।
त्यस्तै भारतीय निर्देशक विक्रम भुरोगाहिनको ‘किकिङ फ्रम द कर्नर’, बेलायती निर्देशक साम कोल्लिनको ‘डेथ अफ जेन्टलम्यान’ तथा रुसकी सोफिया गेवेइलेरको ‘स्प्रिट इन मोसन’ नामका चलचित्र हुनेछन् ।
महोत्सवमा खेलकुद र शान्ति, खेलकुद र पर्यटन, खेलकुद र चलचित्र, नेपालमा खेलकुदको विकास लगाया विषयमा अन्तक्र्रिया समेत गरिने छ । फाउन्डेसनका अध्यक्ष सूर्य थपलियाले खेलकुद मार्फत पर्यटन र पर्यटन मार्फत खेलकुदको विकास गर्दै समग्र देशमा खेलकुद पर्यटनको विकास र विस्तार गर्ने आफूहरूको उद्देश्य रहेको बताए ।
नेपाल इन्डिपेन्डेन्ट फिल्ममेकर्स सोसाइटीका अध्यक्ष अनुप सुवेदीले देशको खेलकुद क्षेत्रको अभिवृद्धिका लागि यस्ता महोत्सव आयोजना गर्न पछि नपर्ने बताए ।
रिसर्च फर कमन ग्राउन्डका कार्यक्रम निर्देशक युवाकर राजकर्णिकार लगायतले देशको खेलकुद विकासमा योगदान पुरयाउन सो विषयमा बढीभन्दा बढी चलचित्र तथा वृत्तचित्र निर्माण हुनुपर्नेमा जोड दिए ।
