लन्डन । चर्चित गायक राजेश पायल राई सांगीतिक कार्यक्रमका लागि बेलायत आउन लागेका छन् । “राजेश पायल राई युके टुर” नाम दिइएको सो कार्यक्रममा नेपाली संगीत क्षेत्रमा आधुनिक तथा पार्श्व गायनमा चर्चित गायक राजेशपायल राईको विशेष प्रस्तुति रहने छ भने बेलायतमा रहेका स्थानीय नेपाली प्रतिभाहरुको समेत प्रस्तुति रहने कार्यक्रमका आयोजकहरुले बताएका छन् ।
“मिनी वर्ल्ड टुर” नामक सांगितिक यात्रा लिएर हिंडेका गायक राजेश पायल राई यही फेब्रुवरी १४ तारिख “प्रेम दिवस“ का दिन सांगीतिक कार्यक्रम सके लगत्तै लण्डन आउँदैछन् ।
देशविदेशका कन्सर्टहरुमा अत्यधिक व्यस्त राजेश पायल राई यसअघि सन् २०१२ मा बेलायत आएका थिए । आयोजक गायक गंगाराज राई र बि सि राईको आयोजनामा बेलायतका विभिन्न शहरहरुमा हुन लागेको सांगीतिक कार्यक्रमलाई स्मरणीय बनाउन आयोजकहरु लागिपरेका छन्।
गायक राईका सयौं लोकप्रिय गीतहरु छन् । जसमध्य पछिल्लो समयमा लाखौं श्रोताहरुले रुचाएको नेपाली फ़िल्म “नाईं नभन्नु ल” को शीर्षक गीत “तिमी संगै जिउने मर्ने चाहना छ मेरो……फेरि फेरि फेरि नाईं नभन्नु ल, सिरै फूल सिर्बन्दी , सर सर माया वर वर, दर्शन नमस्ते, भेटैमा भयो सोल्टिनी ज्यू, ” लगायतका सयौं गीतहरु लोकप्रिय भएका छन् ।
गायक राईले फेब्रुअरीको २१ तारिख फार्नबरोको ओकफार्म कम्युनिटी स्कुलको हलमा, फेब्रुअरी २७ तारिख आश्फोर्ड केन्टको दि नर्थ स्कुलको हल र मार्च ५ तारिखमा रेडिङ्ग को वाएरहाउस स्पोर्ट्स हलमा सांगीतिक प्रस्तुति गर्ने आयोजकहरुले जनाएका छन् । बेलायतको कार्यक्रम सकेपछि गायक राई हङ्कङ जाने कार्यक्रम छ ।
