बुधबार, असोज ७ २०७७ | Wed, September 23, 2020
नेपालको समय: १५:२३ | UK Time: 10:38

संविधान संशोधनमा पच्चीस प्रस्ताव दर्ता

वीनेपाली
२०७२ पुष २३ गते २१:५९

sambidhan sabha

काठमाडौँ, २३ पुस । संविधान संशोधन विधेयकमा २५ संशोधन दर्ता भएका छन् । प्रमुख प्रतिपक्षी नेपाली काँग्रेस र एकीकृत नेकपा (माओवादी)का सांसदले समूहगत तथा व्यक्तिगत रुपमा पनि प्रस्ताव दर्ता गराएका छन् । संसद् सचिवालयका सहायक प्रवक्ता सुदर्शन कुइँकेलका अनुसार निर्धारित समयभित्र समूहगत तथा व्यक्तिगत रुपमा संशोधन प्रस्ताव दर्ता भएका हुन् । उहाँका अनुसार काँग्रेसका नेता विमलेन्द्र निधि, डा मीनेन्द्र रिजाल र फरमुल्लाह मन्सुरले फरक फरक संयुक्त रुपमा संशोधन प्रस्ताव दर्ता गराउनुभएको छ ।

एमाओवादीका रामनारायण बिंडारीलगायत १० जनाले पनि संयुक्त एवम् फरक फरक रुपमा प्रस्ताव दर्ता गराएको सहायक प्रवक्ता कुइँकेलले जानकारी दिनुभयो । यस्तै नेपाल मजदुर किसान पार्टीका प्रेम सुवाल, राष्ट्रिय जनमोर्चाका दुर्गा पौडेल र मीना पुन, नेपाली जनता दलका हरिचरण साह, खम्बूवान राष्ट्रिय मोर्चाका रामकुमार राईलगायतले पनि संशोधन प्रस्ताव दर्ता गराउनुभएको छ । संसद् सचिवालयले संशोधन प्रस्ताव दर्ता गर्न आज अपराह्न २ बजेसम्मको समयसीमा तोकिएको थियो । प्रस्ताव दर्तामा सांसदको चासो बढेपछि सचिवालयले थप तीन घन्टा समय बढाएको थियो ।

दर्ता भएका संशोधन प्रस्तावलाई सभामुखले आवश्यक अध्ययन गरेर प्रक्रिया अगाडि बढाउनुहुनेछ । संविधान र नियम विपरीत दर्ता गराएका प्रस्ताव भने स्वतः अस्वीकृत हुनेछन् । सरकारी विधेयकका रुपमा सदनमा प्रस्तुत भएको संविधान संशोधन प्रस्तावलाई कसरी र कहिले कुन विधिका आधारमा अगाडि बढाउने भन्ने निर्णय सरकारले तय गर्नेछ ।

प्रतिक्रिया

सम्बन्धित सामाग्री

फेसबुक