मन्त्री कमल थापा
काठमाडौँ, २२ पुस । परराष्ट्र तथा उपप्रधानमन्त्री कमल थापाले प्रधानमन्त्री केपी शर्मा ओलीको पहिलो विदेश भ्रमण भारतबाट आरम्भ हुने बताउनुभएको छ ।
रिपोर्टर्स क्लबले आज यहाँ आयोजना गरेको साक्षात्कारमा उहाँले दुवै छिमेकीसँगको सम्बन्ध समानता र पारस्परिक हितका आधारमा अघि बढ्ने बताउँदै प्रधानमन्त्री ओलीको भारत भ्रमणका लागि प्रारम्भिक तयारी सुरु भइसकेको जानकारी दिनुभयो । यद्यपि कुन मितिमा भारत भ्रमण हुने हो भन्नेबारेमा भने केही बताउनु भएन ।
उहाँले नेपाल–भारत सीमा नाकामा देखिएको असमझदारी हट्दै गएकाले वीरगञ्जबाहेक सबै नाका सहजरुपमा सञ्चालनमा रहेको जानकारी दिनुभयो ।
परराष्ट्रमन्त्री थापाले नेपाल भारत र चीनको आर्थिक करिडोर केन्द्रबिन्दु बनाउन सके देशले निकै छिटो समृद्धि हासिल गर्न सक्ने विश्वास व्यक्त गर्नुभयो । उहाँले विभिन्न मुलुकमा चाँडै राजदूत नियुक्ति गरिने जानकारी पनि दिनुभयो ।
तराई मधेसमा संविधानका विषयलाई लिएर आन्दोलनमा उत्रेका संयुक्त लोकतान्त्रिक मधेसी मोर्चासँगको वार्ता निष्कर्षतर्फ उन्मुख रहेको बताउँदै उपप्रधानमन्त्री थापाले भन्नुभयो – “समस्या समाधानका लागि खाका तयार हुँदै गएको छ ।”
परराष्ट्रमन्त्रीका हैसियतले आफूले आर्थिक कूटनीतिलाई प्राथमिकतामा राखेर काम गरिरहेको उल्लेख गर्दै उहाँले त्यो लक्ष्य प्राप्त गर्न संरचनागत र नीतिगत सुधारमा जोड दिइएको बताउनुभयो ।
