सरकारले इस्लामावाद, कोलम्बो र क्वालालम्पुरमा दूतावास भवन निर्माण गर्ने

काठमाडाँै, ११ पुस । मुलुकको परराष्ट्र नीति प्रभावकारी ढङ्गले सञ्चालन गर्न सरकारले पाकिस्तानको इस्लामावाद, श्रीलङ्काको कोलम्बो र मलेसियाको क्वालालम्पुरमा राजदूतावास भवन निर्माण गर्ने भएको छ ।

प्रधानमन्त्री तथा मन्त्रिपरिषद्को कार्यालयले गत बिहीबार सार्वजनिक गरेको तत्काल सुधार कार्ययोजनाअनुसार आगामी दुई वर्षभित्र ती मुलुकमा राजदूतावास भवन निर्माण हुनेछन् । त्यसैगरी थाइल्यान्डको बैंकक, स्विट्जरल्यान्डको जेनेभा, फ्रान्सको पेरिस वा बेल्जियमको ब्रसेल्समा दूतावासका लागि भवन खरिद गर्ने सरकारको योजना छ ।

लामो समयदेखि ती राष्ट्रमा आफ्नै भवन नहुँदा कूटनीतिक कार्यसम्पादन तथा सेवा प्रवाहमा कठिनाइ भएको थियो । साथै विदेशी मुद्रामा नेपाली कूटनीतिक नियोग सञ्चालन गर्दा राष्ट्रको व्ययभार पनि बढिरहेको थियो । नेपालको खरिद प्रक्रिया र सम्बन्धित मुलुकको किनबेचको पद्धतिमा सामाञ्जस्य कायम हुनुपर्ने भएकाले तोकिएको अवधिमा भवन खरिद गर्न परराष्ट्र र अन्य सहयोगी निकायले कठोर परिश्रम गर्नुपर्ने छ ।

कार्ययोजनाले निर्धारण गरेका काम तोकिएको समयभित्र पूरा गर्न परराष्ट्र मन्त्रालय, मातहतका महाशाखा, शाखा, विभाग, प्रधानमन्त्री तथा मन्त्रिपरिषद्को कार्यालय, सामान्य प्रशासन, अर्थ, गृह र अन्य सरोकार मन्त्रालयले सहयोगीको भूमिका निर्वाह गर्नुपर्नेछ । गत मङ्सिर २४ गतेको मन्त्रिपरिषद् बैठकले दुईवर्षे तत्काल सुधार कार्ययोजना पारित गरेको थियो ।