लन्डनमा नेपालीले खिचे पृथक म्यूजिक भिडियो

लन्डन । नेपाली म्यूजिक भिडियो अब बुट्यान, पार्क वा नदी किनारतिर सिमित रहेनन् । नयां प्रविधि भित्रिएसंगै नेपाली गीतका म्यूजिक भिडियोले नयां स्वाद दिइरहेका छन् । सायद यस्तै भिडियो निर्माणले होला, अचेलका गीत सुन्दा होइन, हेर्दा मज्जा आउंछ ।

क्रिसमस इभका दिन लन्डनमा खिचिएको एउटा गीतको म्यूजिक भिडियोमा त्यस्तै पृथक शैली अपनाएका छन् नेपाली युवाले ।

नवराज घलेले व्यवसायिक गायकको चिनारी बनाउन त अझै बांकी छ तर उनले आफ्नो पहिलो एल्बममा रहेको गीत आज आइ भन्छेऊ छोडिदेऊ, यो मन कतै अन्तै मोडिदेऊ…को म्यूजिक भिडियो अलिक भिन्न बनाउन चाहेपछि सम्पर्क गरे कुशल श्रेष्ठलाई । हरेक भिडियोमा केही ने केही फरकपन दिन चाहने बेलायतका स्थापित सञ्चारकर्मी कुशल श्रेष्ठको निर्देशन, छायांकन र सम्पादन अनि सहायक निर्देशनमा कृष्ण सुवेदीले साथ दिएपछि भिडियोले नयां रुप धारण गरिहाल्यो ।

र्याप र मेलोडी मिश्रित गीतको भिडियो छायांकन गर्न लोकेशन रोजियो लन्डनस्थित वाटरलु ग्राफिटी । त्यो भेन्यू नै यस्तो रफ देखिन्छ जहां टनेलभित्र जताजतै पेन्टिङ छ । त्यस्तो ठाउं रक टाइपका गीतमा भिडियो बनाउन गज्जब हुने रहेछ । छिट्टै पहिलो एल्बम निकाल्ने तयारी गरिरहेका युवा नवराज घलेले भिडियोका लागि तीनवटा स्पोर्टस् बाइक र एउटा कारको प्रयोग गरिएको जनाए । र्याप गीत भएकाले त्यस्तो लोकेशन खोजिएको हो । भिडियो निर्माणमा कुनै सम्झौता नगरिएको निर्माण पक्षको दावी छ ।
चार मिनेटको गीतमा पृथक भिडियो बनाउन नेपालीले खर्च गरेको यो नै पहिलो भनिएको छ ।

निर्देशक श्रेष्ठले उक्त भिडियोमा सारा सिरपाली, सुशील थापा र प्रवीन गुरुङलाई अभिनय गराएका छन् । अहिले चर्चा भइरहेको गायिका अन्जु पन्तको जुनी जुनी…गीतबाट श्रेष्ठले नै सारालाई प्रवेश गराएका थिए । तस्विरहरुः के के मूभिज प्रोडक्शन