पेरिस, ११ मङ्सिर । यही नोभेम्बर १३ मा फ्रान्सको राजधानी पेरिसमा भएको आतङ्ककारी हमलामा मारिएका नागरिकप्रति श्रद्धाञ्जली अर्पण गर्न फ्रान्सको राजधानी पेरिसमा शुक्रबार शोकसभाको आयोजना गरिएको छ ।
उक्त सभामा फ्रान्सका नागरिकले स्वतस्फुर्त रुपमा सहभागिता जनाउने बताइएको छ । फ्रान्सेली नागरिकले यसअघि पनि सो आतङ्ककारी हमला गरिएको स्थानमा पुगेर श्रद्धान्जली अर्पण गरिरहेका छन् ।
शुक्रबार आयोजना गरिएको सो शोकसभाअघि पेरिसमा रयालीको पनि आयोजना गरिएको छ । सो रयालीको नेतृत्व फ्रान्सेली राष्ट्रपति फासाँ अल्याण्डले गर्नुहुने पनि जनाइएको छ ।
उक्त सभामा सो आतङ्ककारी हमलामा मारिएका व्यक्तिका आफन्तका साथै कतिपय घाइतेको पनि सहभागिता हुने जनाइएको छ ।
यस कार्यक्रममा सहभागिताका लागि सरकारले सबै नागरिकलाई आह्वान पनि गरेको छ । सबैले फ्रान्सको राष्ट्रिय झण्डा लिएर सभामा सहभागिता जनाउने अनुमान गरिएको छ ।
उक्त रयालीपछि आयोजना हुने सभालाई राष्ट्रपति अल्याण्डले सम्बोधन गर्नुहुने छ । सो सभाको प्रत्यक्षा प्रशारणको व्यवस्था मिलाइएको पनि फ्रान्सका टेलिभिजनहरुले जनाएका छन् ।
फ्रान्सको राजधानी पेरिसमा भएको सो हमलामा परी कम्तीमा पनि १२९ जनाको ज्यान गएको थियो । त्यसमा परी अरु तीन सय भन्दा बढी व्यक्ति घाइते भएका थिए ।
यो आक्रमणपछि फ्रान्सले आइएस विरुद्धको कारबाहीलाई तिब्र बनाएको छ । त्यस्तै फ्रान्सेली युद्धक विमानले सिरियाको राक्वा सहरमा व्यापक मात्रामा हवाई जारी राखेको छ ।
ती विमानहरुले इस्लामिक अतिवादी समूह आइएसको प्रभाव रहेको ठानिएको सिरियाको राक्वान नगरमा सोमबार रातिदेखि हवाई हमला गरिरहेका छन् ।
सो क्षेत्रमा आइएस लडाकूको शिविर रहेको सूचनाका आधारमा सो कारबाही गरिएको हो । साथै फ्रान्सले आइएसका विरुद्धमा कारबाही गर्नका लागि विश्वव्यापी रुपमा अरु देशहरुसँग पनि सहयोग मागिरहेको छ ।
फ्रान्सको राजधानी पेरिसमा भएको आतङ्ककारी हमलामा आइएसका लडाकूको प्रत्यक्ष सम्लग्नता भेटिएपछि आइएसका विरुद्ध पनि फ्रान्सले सो आक्रमण थालेको हो ।
फ्रान्सेली राष्ट्रपति फासाँ अल्याण्डले सिरिया आतङ्ककारीको मूल थलोका रुपमा रहेको भनाई राख्नुभएको थियो ।
उहाँले आतङ्ककारीका विरुद्धको कारबाहीलाई जस्तोसुकै अवस्थामा पनि अघि बढाइने प्रतिबद्धता व्यक्त गर्दै आउनुभएको छ ।
