लण्डनको पशुपति मन्दिरमा मनाइयो शिवरात्री

लण्डन । बेलायतमा नेपालीहरुद्वारा स्थापित पहिलो नेपाली मन्दिर पशुपतिनाथ मन्दिर प्लम्स्टिडमा हिन्दुहरुको महान पर्व शिवरात्री विशेष पूजाआजासहित भब्य रुपमा मनाइएको छ ।

साउथ लण्डनस्थित मन्दिर परिसरमा बिहान ७ बजेदेखि नै स्थानिय नेपाली समुदायका भक्तालुहरुको घुईचो लागेको थियो  ।

पण्डितद्वय निलहरी घिमिरे तथा विनोद पन्थीद्वारा रुद्राभिषेक सहितको पूजा प्रारम्भपछि दिनभरि नै पूजाआजा निरन्तर संचालन गरिएको थियो । प्रात, मध्यान्ह र सन्ध्यामा गरी तीन पटक पूजा सहितको विशेष आरती सम्पन्न भएको थियो । बीचबिचमा शिव महिमाको सत्संग र भजन किर्तन  पनि गरिएको थियो भने साँझको आरति पछिको भजन किर्तनमा भक्तालुहरु नाचगानमा झुमेका देखिन्थे ।

मन्दिर संचालन समितिका अध्यक्ष होम शर्माले बिहान ७ बजेदेखि राति अबेरसम्म सयकडौ दर्शनार्थीहरु सहभागी भएको जानकारी दिए । “अहिलेको भवनको सुरक्षा प्रवन्ध सहितको केही मर्मतसम्भारसंगै पूजा हलको बिस्तार गर्नाले ठूलो संख्यामा भक्तजनहरुलाई एकै समयमा पनि स्वागत गर्न सकियो”, उनले भने ।

यस अवसरमा मन्दिर समितिका पदाधिकारीका साथै  स्थानीय समाजसेवी, ब्यवसायी लगायतका सर्वसाधारणहरु स्वयम् व्यवस्थापनमा खटेका थिए ।

विश्वभरका हिन्दुहरुले विशेष रुपमा भगवान शिवको पूजा आराधना एवम्  उपवास गरेर मनाउने गरेको महाशिवरात्री पर्व बेलायतका नेपाली बस्ती भएका अन्य क्षेत्र अल्डरसट, बर्मिङ्घम , वेम्ली लगायतका स्थानका स्थानीय मन्दिरहरुमा पनि भब्य रुपमा सम्पन्न भएको बताइएको छ ।

बेलायतका नेपालीहरूले  शिवरात्रिको शुभकामना तथा आफ्ना धार्मिक गतिविधिहरु फेशबुक लगायतका सामाजिक संजालमा पनि उल्लेख्य रुपमा छरपस्ट पारेका थिए ।