डी मारियालाई गोरखा सुरक्षा गार्ड राख्न बायर्न रुनीले दिए सुझाव

लण्डन । इंग्ल्याण्डको राष्ट्रिय फुटबल टोली तथा म्यानचेष्टर युनाइटेडका क्याप्टेन बायर्न रुनीले म्यानचेष्टर युनाइटेडका सहकर्मी फुटबलर एञ्जल डी मारियालाई गोरखाहरुलाई सुरक्षा गार्ड राख्न सुझाव दिएका छन् ।
यसै सिजनदेखि इंग्ल्याण्ड आएका अर्जेण्टिनी राष्ट्रिय टोलीका सदस्य मारियाको घर हालै फोडिएको थियो । हतियारधारी जत्थाले घर फोडेपछि मारियाको परिवार त्रसित हुँदै आएको छ ।
सो घटनापछि मारिया अहिले श्रीमती जोर्गेलिना र एक वर्षकी छोरी मियासित होटलमा बस्दै आएका छन् ।
गोरखाहरुलाई सुरक्षा गार्ड राख्दै आएका रुनीले मारियालाई घरको सुरक्षाका लागि गोरखाहरुलाई राख्न सुझाव दिएका हुन् ।
२७ वर्षीय मारिया स्पेनको रियल म्याडि्रडबाट म्यानचेष्टर युनाइटेडमा आएका हुन् । महंगो मोलमा युनाइटेडमा आए पनि उनले प्रभाव पार्न भने सकेका छैनन् ।
रुनीले आफ्नो घरको सुरक्षाका लागि लामो समयदेखि नेपाली गोरखाहरुलाई राख्दै आएका छन् । दक्षिण अफ्रिकामा पाँच वर्षअघि सम्पन्न विश्वकप फुटबलताका नै रुनीले गोरखाहरुलाई घरको सुरक्षार्थ राखिएकाले आफू निश्चिन्त भएको बताएका थिए ।
रुनीले सन् २०१० देखि गोरखाहरुलाई सुरक्षा गार्ड राखेको बेलायतको स्थानीय सन् पत्रिकाले जनाएको छ । उनको घर रहेको चेसियर क्षेत्रमा चोरी डकैती बढ्न थालेपछि उनले गोरखाहरुको सहायता लिनु परेको थियो । त्यतिबेला उनका सहकर्मी तथा अहिले वेष्ट ब्रोमीच अल्बालियनका मिडफिल्डर डेरेन फ्लेचरकी मंगेतरलाई चोरहरुले छुरा देखाई लुटपाट गरेका थिए ।
स्रोतका अनुसार चोरहरुको प्रवेशपछि मारियाकी श्रीमती भयभीत बनेको र उनीहरुले भाडामा लिएको चेसियरस्थित घरमा जान नमानेको बताइएको छ ।
रुनीले मारियलाई दिएको सुझाव उल्लेख गर्दै डेली मिररले भनेको छ, ‘गोरखाहरुको सैन्यमा आकर्षक क्यारियर छ । उनीहरुलाई सुरक्षाको जिम्मा दिएपछि कोही पनि घरको नजिक पर्नै खोज्दैनन् ।’
दुईसय वर्षदेखि बेलायती सेनाका अंग बन्दै आएका गोरखाहरु वीरता, इमानदारिताका लागि संसारभर कहलिएका छन् ।
गोरखाहरुसित फोकल्याण्डमा लडाइँ लडेको देश अर्जेण्टिनाका नागरिक मायिराले पक्कै पनि गोरखाहरुका बारेमा त सुनेका होलान् । किनकि उनकै देशका महान फुटबल खेलाडी डियगो म्याराडोनाले इंग्ल्याण्डलाई हराएपछि भनेका थिए, ‘हामीले इंग्ल्याण्डलाई हरायौँ किनकि त्यहाँ गोरखाहरु थिएनन् ।’