मास्के
लन्डन । गोर्खा सत्याग्रह संयुक्त संघर्ष समितिले सञ्चार निर्देशक दीपक मास्केको राजीनामा स्वीकृत नगर्ने जनाएपछि मास्केले गोर्खा आन्दोलन तार्किक निष्कर्षमा पुर्याउने अठोट व्यक्त गरेका छन् ।
गोर्खा सत्याग्रह आन्दोलनले यो उचाईं लिनुमा मास्केको अहम भूमिका रहेको उल्लेख गर्दै समितिका प्रमुख संयोजक कृष्णबहादुर राईले सर्वसम्मत रुपमै मास्केको राजीनामा स्वीकृत नगर्ने लिखित जवाफ पठाएका थिए । पछि मास्केले एक विज्ञप्तिमार्फत सत्याग्रहभित्र पुरै आवद्ध नभइ सत्याग्रहको मुल्य, मान्यता र आधारमा रहेर आन्दोलनको परिस्थितिलाई पुनरावलोकन गराउन प्रयास गर्ने बताएका छन् । आफ्नो राजीनामापछि गोर्खा समुदायबाट आएका व्यापक प्रतिक्रिया र राजीनामा फिर्ता गर्न गरेको आग्रह स्वीकार्दै मास्केले सिमित जिम्मेवारीभित्र रहेर आन्दोलन निष्कर्षमा लैजाने जनाएका हुन् ।
मास्केले आन्दोलनको भावी कार्यक्रममा प्रत्यक्ष सहभागी नहुने जनाउंदै लिखित कार्यमा मात्र सिमित हुने प्रष्ट्याए । ब्रिटिश सरकारले हालै गरेको घोषणाप्रति खेद व्यक्त गर्दै मास्केले त्यो हेपाहा र हचुवामा गरिएको निर्णयलाई निष्पक्ष समिति (सेलेक्ट कमिटी) मा पुनरावलोकन गराउन प्रयास गर्ने प्रतिवद्धता व्यक्त गरेका छन् । भूपू गोर्खाका वयस्क आश्रितका लागि प्रकाशित नयां नीति झन् अन्योल र अन्यायपूर्ण भएकोले त्यसलाई सरलीकरण गराउन पहलका लागि अध्यागमन मन्त्रीसंग छलफल कार्यक्रम राखी तार्किक आग्रह गर्ने योजना पनि मास्केको छ । यस अलावा कर्णेल हामिस् एडम्स्ले सशक्त ढंगले अगाडि बढाइरहेको गटको मुद्दालाई पूर्ण सहयोग गर्ने उनले जनाएका छन् । मास्केले गोर्खा समुदायले आफूप्रति राखेको अटल विश्वास र शुभेच्छाका लागि धन्यवाद समेत व्यक्त गरेका छन् ।
