शुक्रबार, मंसिर १९ २०७७ | Fri, December 04, 2020
नेपालको समय: ००:५२ | UK Time: 19:07

गोरखा सत्याग्रहबाट मास्केले राजीनामा दिए

वीनेपाली
२०७१ माघ १९ गते १४:४२
मास्के

मास्के

लन्डन । गोर्खा सत्याग्रह संघर्ष समिति, बेलायतका सञ्चार निर्देशक दीपक मास्केले आफ्नो पदबाट राजीनामा दिएका छन् । सत्याग्रहभित्रका केही सदस्यहको कार्यशैली आफ्नो र सत्याग्रहको मुल्य, मान्यता र सिद्धान्त विपरित भएको भन्दै मास्केले आज सोमबार संयोजक कृष्ण राई समक्ष लिखित राजीनामा बुझाएका हुन् । अंग्रेजी लेख्न, बोल्न पोख्त मास्के सत्याग्रहका एकजना प्रभावशाली व्यक्तित्व थिए ।
आइतबार नर्थहोल्टमा भएको सत्याग्रह समितिको बैठकमा मौखिक राजीनामाको घोषणा गरेका मास्केले लिखित पत्रमा गोर्खा समुदायलाई धोका हुने र भ्रमित तुल्याउने किसिमको प्रचारप्रसार र कार्यशैली भएको जनाउंदै अब उप्रान्त उक्त जिम्मेवारी वहन गरिरहन नैतिकताले नदिने बताएका छन् । सत्याग्रहभित्र गेसो चरित्र हावी भएको आरोप लगाएका मास्केले को को सदस्यबाट धोका भएको भन्ने चाहिं पत्रमा खुलाएका छैनन् ।
बेलायती रक्षा मन्त्रालयले सर्वदलीय संसदीय समितिको प्रतिवेदनपछि गत साता सार्वजनिक गरेको आफ्नो प्रतिक्रियालाई समितिले ऐतिहासिक उपलव्धि भने पनि मास्केले यसमा असहमति जनाउंदै आएका थिए ।
उनले बेलायत सरकारको उक्त निर्णयलाई हचुवा र हेपाहा प्रवृत्तिको भन्दै घोर भर्त्सना गर्नुको सट्टा साना साना कुरा र असान्दर्भिक विषयवस्तुमा उत्साहित हुनु वाञ्छनीय नभएकाले समितिले त्यसको विरोध पत्र लेख्नेमा आशा समेत व्यक्त गरेका छन् ।
मास्केले आफ्नो कार्यकालमा सहयोग गर्ने गोर्खा समुदाय, मिडिया र अरु सबैप्रति आभार व्यक्त गरेका छन् ।

प्रतिक्रिया

सम्बन्धित सामाग्री

फेसबुक