शुक्रबार, असोज २ २०७७ | Fri, September 18, 2020
नेपालको समय: १३:४२ | UK Time: 08:57

आफ्नो जिम्मेवारीप्रति प्रा.डा. सुवेदी सन्तुष्ट

वीनेपाली
२०७१ माघ १७ गते १३:४९

03-15-2013surayasubedi
लण्डन । कम्वोडियाका लागि संयुक्त राष्ट्रसंघका विशेष प्रतिनिधि प्रा.डा. सूर्यप्रसाद सुवेदीले आफ्नो जिम्मेवारीप्रति सन्तुष्ट भएको बताएका छन् ।
बेलायतस्थित नेपाली समुदायका प्रवुद्ध व्यक्तित्व सुवेदी सन् २००९ को मार्चमा राष्ट्रसंघको मानवअधिकार काउन्सिलबाट विशेष प्रतिनिधिका रुपमा नियुक्त भएका थिए ।
आफ्नो छ वर्षे कार्यकालको समीक्षा गर्दै कम्वोडियामा गत साता आयोजना गरिएको पत्रकार सम्मेलनमा उनले आफ्नो कार्य प्रगतिप्रति सन्तोष व्यक्त गरे ।
राष्ट्रसंघलाई पाँचवटा प्रतिवेदन पेश गरिसकेका सुवेदीले प्रतिवेदनमा उल्लिखित धेरै सुझावहरु कार्यान्वयन भएका वा कार्यान्वयन हुने प्रक्रियामा रहेको बताए ।
कम्वोडियाका प्रतिपक्ष र सत्ता पक्ष दुवैले निर्वाचन प्रणालीमा सुधार गर्ने प्रतिवद्धता व्यक्त गरेका कारण आफू धेरै आशावादी भएको उनले बताएका छन् ।
सबैभन्दा ठूलो कुरा त कम्वोडियाका जनताहरु आफ्ना अधिकारका बारेमा सचेत भएका र अधिकारका बारेमा नडराइ बोल्न सक्ने भएकामा उनले उपलब्धि ठानेका छन् ।
शुरुवात भएका राजनीतिक सुधारका प्रक्रियाहरु अब पछाडि नफर्कने आशा उनले व्यक्त गरेका छन् ।
कम्वोडियाको प्रजातन्त्र, कानुन र मानव अधिकारलाई मजबुत पार्ने कार्यमा आफू सरिक हुन पाएकोमा उनले खुशी व्यक्त गरेका छन् ।
उनले कम्बोडिया सरकारलाई स्वतन्त्र निकायहरुलाई बिना हस्तक्षेप काम गर्न दिन सुझाव दिएका छन् ।
राजनीतिक स्थिरताका कारण कम्वोडिया आर्थिक रुपमा पनि अगाडि बढ्दै गएको तर धनी र गरिब बीचको बढ्दो खाडल आफैँमा चुनौतीका रुपमा खडा हुँदै गएको उनले बताए ।
सुवेदी अघिका राष्ट्रसंघका दुई दुतहरुले आफ्नो अवधि सकिनअघि नै राजीनामा दिएका थिए ।
सुवेदीलाई कम्वोडियाका सत्तापक्षीय दलका कार्यकर्ताहरुले विरोध र दुर्व्यवहार गरे पनि उनले कम्बोडियाका जनताको गुणस्तरीय जीवनका लागि केही योगदान गर्नुपर्छ भनेर राजिनामा नदिएको बताए ।
‘म भगुवा होइन, चुनौतीको डटेर सामना गनुपर्छ भन्ने मान्यताको व्यक्ति हुँ’ उनले कम्वोडियाको नोमपेह पोष्टसित भनेका छन् ।
सुवेदीको कार्यकाल यही अप्रिलमा सकिँदैछ ।

प्रतिक्रिया

सम्बन्धित सामाग्री

फेसबुक