तस्विरः धर्म तामाङ
लन्डन । बेलायतवासी तामाङ जातीले आफ्नो महान पर्व ल्होछार मनाएका छन् । उनीहरुले २८५१ सोनाम ल्होछार (भेडा वर्ग) मनाएका हुन् । सांस्कृतिक पर्व ल्होछार एवं नयां वर्ष गत २१ तारिखका दिन परेपनि कार्यव्यस्तताले सप्ताहन्तमा कार्यक्रम गरिएको हो । तामाङ संस्कृति अनुसार, १२ वटा लोहोमध्ये घोडा वर्षको विदाइ गरि भेडा वर्षको स्वागत गरिएको आयोजक तामाङ सोसाइटी अफ यूकेका पूर्व अध्यक्ष धर्म तामाङले जनाए ।
शनिवार सामुयल कोडी स्पोर्टस् कलेज हलमा सोसाइटी अध्यक्ष धन लामाको अध्यक्षता र दूतावास थर्ड सेक्रेटरी सूर्यबहादुर थापाको प्रमुख आतिथ्यतामा ल्होछार कार्यक्रम सम्पन्न भएको हो । सोसाइटीले बेलायतमा सन् २००६ बाट हरेक साल ल्होछार मनाउंदै आएको छ ।
देउराज तामाङले सञ्चालन गरेको पहिलो चरणको औपचारिक कार्यक्रममा सोसाइटीका अध्यक्ष धन लामाले अतिथीहरुको स्वागत एवं ल्होछारको शुभकामना दिए भने लामा गुरु प्रेम लामाले सोनाम ल्होछारको सांस्कृतिक महत्वबारे बताए । दूतावासका थर्ड सेक्रेटरी थापाले पनि शुभकामना दिए ।
कार्यक्रममा प्रमुख लामा गुरु प्रेम लामा तामाङले सांसेर्गेंम पूजा र आर्शिवाद
दिए ।
उक्त अवसरमा ग्रयाजुएसन, पिएचडी गर्ने तामाङ विद्यार्थीहरुलाई प्रशंसापत्र समेत प्रदान गरिएको थियो ।
कार्यक्रममा नेपालबाट आएका लोकप्रिय गायक मिलन लामा र स्थानीय गायक मिलन तामाङको गायनमा करिब ६ सय सहभागी धित मरुञ्जेल नाचे । सांस्कृतिक कार्यक्रम सत्य मोक्तान र क्रान्ति योञ्जनले सञ्चालन गरेका थिए । सांस्कृतिक कार्यक्रम संयोजन सचिव मणि तामाङले गरेका हुन् । पेय पदार्थ व्यवस्थापन विमला तामाङ, खाना गंगु लामा र सजावट व्यवस्थापन उपाध्यक्ष प्रताप लामाले गरेका थिए । राफल चिट्ठा सोसाइटीका उपाध्यक्ष प्रताप लामाले सञ्चालन गरेका थिए । ल्होछार कार्यक्रममा बुद्धिष्ट कम्युनिटी सेन्टरका काजी शेर्पा, थकाली सेवा समाज रेशम शेरचन, सुनुवार समाज यूके अन्य विभिन्न संघसंस्थाका प्रतिनिधिहरुको सहभागिता थियो ।
उता, तामाङ सामाज यूकेले पनि आज सांझ (२५ तारिख) ओकिङ्टन म्यानर हल, स्टोनब्रीजमा भव्य समारोहबीच ल्होछार मनाउने तयारी गरेको समाजकी सचिव क्रान्ति योञ्जनले जनाएकी छन् ।
