मंगलबार, असोज ६ २०७७ | Tue, September 22, 2020
नेपालको समय: १६:४० | UK Time: 11:55

संघीयता विरोधी सामग्री प्रसारण गरेको भन्दै बीबीसी नेपाली सेवाप्रति खेद

वीनेपाली
२०७१ माघ ५ गते २०:५७

BBC nepali logo

लण्डन । संघीय समाजवादी पार्टीको बेलायतस्थित भातृ संगठन संघीय समाज युकेले बीबीसी नेपाली सेवाप्रति खेद व्यक्त गरेको छ ।

समाजको हिजो लण्डनमा सम्पन्न बैठकले बीबीसी नेपाली सेवाले संघीयता विरुद्ध श्रंखलावद्ध ढंगले समाचार सामग्री प्रस्तुत गर्दै आएको भन्दै समाजले खेद प्रस्ताव पारित गरेको छ । साथै बीबीसी विश्व सेवालाई यसबारे लिखितरुपमा विरोधपत्र पनि बुझाउने निर्णय गरेको छ। यसका लागि सचिव मिलनचन्द्र राईलाई संयोजक तोकिएको छ । 

बेलायती रक्षा मन्त्रालयमातहतको बीएफबीएस गोरखा रेडियोबाट प्रसारित सामग्रीका बारेमा पनि बैठकमा गम्भीर छलफल भएको थियो तर बीएफबीएसका बारेमा भने कुनै निर्णय गरिएको छैन ।

यसैगरी नेपालमा पहिचानसहितको संघीय व्यवस्था स्थापना गराउनका लागि समाजले लण्डनस्थित नेपाली राजदुतावास मार्फत राष्ट्रपति र सभामुखलाई ज्ञापनपत्र बुझाउने भएको छ । सो ज्ञापनपत्रको तयारीको ब्यहोरा उपमहासचिव कमल राईले बैठकलाई जानकारी दिएका थिए । 

नेपालमा निर्माणाधिन संविधानमा न्यूनतम मानव अधिकारको समेत ब्यवस्था हुन नसक्ने, स्थायी शान्तिको सट्टा युद्धको शुरुवात हुन लागेको, देशविदेशको लोकप्रिय तथा सर्वस्वीकार्य प्रचलनको आधारमा राज्यको पुनर्संरचना नगरी एकजातिको मात्र हालीमुहाली रहने संरचना निर्माण गर्न लागेकोले नेपालमा अशान्ति शुरु हुने संकेत देखिएको त्यसले छिमेकी मुलुक चीन र भारतलाई पनि असर गर्ने भएकोले लण्डनमा रहेका चीन, भारत, अमेरिका, संयुक्त राष्ट्रसंघको दुतावास र युके सरकारलाई स्मरणपत्र दिने पनि बैठकले निर्णय गरेको छ ।

समाजले रसमूर शाखाको अधिवेशन समन्वयको लागि वरिष्ठ उपाध्यक्ष जंग सुनुवार, आसफोर्ड शाखाको अधिवेशनका लागि केन्द्रीय उपाध्यक्ष राजेन्द्र खिम्दिङलाई र लेसस्टर नटिङहाम क्षेत्रको शाखा निर्माणको लागि प्रवक्ता काङमाङ नरेसलाई जिम्मेवारी तोकेको छ । 

बैठकले पूर्व सचिव किरण टि लिम्बुलाई केन्द्रीय अनुसासन विभाग सदस्यमा मनोनयन गरेको छ भने शिवहरी गुरुङ, मंगलबहादुर गुरुङ र मनशोभा गुरुङको एमाले त्याग गरी पार्टी प्रवेश गरेकोमा स्वागत गरेको थियो ।

यस्तै समाजले सदस्यहरुसंग प्रभावकारी जनसम्पर्कका लागि  आफ्नै वेवसाइट पनि संचालन गर्ने भएको छ ।

बैठकको सभापतित्व अध्यक्षता समाजका अध्यक्ष धर्म तामाङले गरेका थिए भने मध्यस्तताको भूमिका महासचिव विश्वासहाँङ खेवाहाँङले गरेका थिए ।

 

प्रतिक्रिया

सम्बन्धित सामाग्री

फेसबुक