लण्डन । मगर संघ युकेको मातहतमा हालसालै स्थापना भएको मगर बिज्नेस फोरमले व्यवसायीहरुबीच विभिन्न विषयमा परामर्श आयोजना गरेको छ ।
अल्डरसटस्थित भेटघाट रेष्टुरेन्टमा आयोजना गरिएको सो कार्यक्रममा फाइनान्सियल एडभाइजर मीन दर्लामीमगरले घरजग्गा खरिद बिक्री र माेर्गेजका बारेमा, विगत सात वर्षदेखि युकेमा पव र रेष्टुरेन्ट सञ्चालन गर्दै आएका रत्न रानाले पव तथा रेष्टुरेन्ट व्यवसाय सञ्चालनका बारेमा र नेपाल पत्रकार महासंघ युकेका वरिष्ठ उपाध्यक्ष नरेश खपाङ्गीमगरले मिडियाले व्यवसायलाई कसरी सहयोग गर्छ भन्ने बारेमा जानकारी दिएका थिए ।
फोरमका संयोजक विजय थापाको अध्यक्षता र सचिव मीन दर्लामीको सञ्चालनमा भएको सो कार्यक्रममा फोरमका सदस्य दीप रानाले फोरम गठनबाट हुने फाइदाहरुका बारेमा अवगत गराएका थिए ।
व्यवसायी रमेश सराङकोटीले फोरमका विभिन्न आयामहरुका बारेमा प्रकाश पार्दै फोरमको प्रस्तावित विधान पेश गरेका थिए । जसलाई छलफलपछि पारित गरिएको थियो ।
कार्यक्रममा मगर संघ युकेका अध्यक्ष दुतबहादुर पुन, पूर्व अध्यक्ष थर्कबहादुर राना लगायत करिब दुई दर्जन व्यवसायीहरुको उपस्थिति रहेको थियो । व्यवसायीहरुले कार्यक्रममा आफ्ना व्यवसायका अनुभव आदानप्रदान गरेका थिए ।
सो अवसरमा फोरममा नेम थापा र भरत थापालाई नयाँ सदस्य नियुक्त गरिएको थियो । यसैगरी, फोरमका सदस्य दालमान पुनलाई पितृशोक परेकोमा एक मिनेट मौनधारण गरी शोक प्रस्ताव पारित गरिएको थियो ।
समुदायमा विभिन्न व्यवसाय गरिरहेका व्यवसायीहरुबीच अनुभव आमोदप्रमोद गर्न र व्यवसायमा लाग्न चाहनेहरुलाई प्रोत्साहन दिनका लागि फोरम गठन गरिएको बताइएको छ ।
