राबाखोला समाज र नर्भिकको सहयोगमा खोटाङ्ग बाक्सिलामा स्वास्थ्य शिविर

बेलायत । नर्भिक अन्तर्राष्ट्रिय अस्पताल र मिसन टु हेल्प नेपाल नामक च्यारिटी संस्थासँगको सहकार्यमा युके बाक्सिला स्वास्थ्य शिविर सम्पन्न भएको छ ।
मंसिर १५ र १६ गते दुई दिन संन्चालन गरिएका उक्त शिविरमा १५ गाविसका १ हजार ५० जना बिरामीले स्वास्थ्य सेवा लिएको गैर आवासीय नेपाल संघ युकेका उपाध्यक्ष हीराधन राईले जानकारी दिए ।

स्वास्थ्य चौकी भवन, बाक्सिलामा बिहान ९ देखि सांझ ५ बजेसम्म चलेको स्वास्थ्य शिविरको पहिलो दिन बाक्सिला, दिप्सुंग, वादेल, ऐसेलुखर्क, सुङ्देल, राखा र माक्पा गाविस तथा दोश्रो दिन बास्पानी, खार्ताम्छा, फेदी, पाथेका, खार्मी, जाल्पा, सप्तेश्वर र दुवेका स्थानीय बासिन्दालाई सेवा उपलब्ध गराइएको शिविरका संयोजक समेत रहेका राईले बताए ।
विशेषज्ञ चिकित्सकले हेरे लगत्तै जटिल प्रकृतिका बिरामीहरु स्पाईनल ईन्जुरी, रुखबाट लडेर ढाड भाँचिएका, ६ वर्षदेखि भुँडी सुन्निएका र हात भाँचिएर तेतिकै गाउँमा बसेका बिरामीहरुलाई काठमाण्डौंको नर्भिक अस्पतालमा थप निशुल्क उपचारको लागी रेफर गरिएको थियो ।
शिविरमा आएका महिलाहरुमध्ये ६० प्रतिशतको आङ्ग खस्ने समस्या थियो ।
मिसन टु हेल्प नेपालकी अध्यक्ष बबिता लामाले नर्भिक अस्पतालले चिकित्सिक टोली, नर्स, औषधी र उपकरण निःशुल्क रुपमा उपलव्ध गराएकाले शिविरमा साना ठूला सबै रोगका बिरामीले उपचार तथा औषधी पाएको बताइन् । उनी शिविर सन्चालनका लागि बेलायतबाट गएकी थिइन् ।

नर्भिकका महाप्रबन्धक रवि शर्माले नर्भिक अस्पतालले गरेको निःशुल्क स्वास्थ्य शिविरहरुमध्ये बाक्सिलाको शिविर अहिलेसम्मकै सफल र ठूलो भएको जानकारी दिए ।

शिविरका लागि गएका चिकित्सक आवास र खानपिन एवं औषधि लैजान हेलिकप्टरका लागि रावाखोला सेरोफेरो यूकेबाट छुटै टिम बनाइएको थियो । जस्मा मेजर दिलकुमार राई, मेजर योगेश राई, महासचिव सप्तराज राई र एनआरएन युके उपाध्यक्ष हिराधन राईले शिविरको व्यवस्थापन गरेका थिए ।

शिविरमा नर्भिकबाट चिकित्सकहरु जनरल फिजिसियन एवं गाइनोलोजिष्ट डा बन्दना पाण्डे, जनरल फिजिसियन डा प्रगति थापा, सर्जन डा गौरवराज ढकाल, कार्डियोलोजिष्ट डा शिवजी सिलवाल, महाप्रवन्धक रवि शर्मा र सिनियर नर्स सृष्टि रावत र बेलायतबाट दुई जना नर्सहरु बविता लामा र सुनिता राईले साथ दिएका थिए । शिविरका लागि सबै उपकरण र औषधी लगायतको व्यवस्थापन नर्भिककी निर्देशक मेघा चौधरी शाक्यले समन्वय गरेकी थिइन् ।