दूतावासको ५० लाखको गेट वर्ष दिनमै बिग्रियो

लन्डन – राजदूत फेरिएपिच्छे भवन बिक्री प्रकरणले चर्चामा आइरहने लन्डनस्थित नेपाली दूतावास साँच्चिकै नमुना छ । जीर्ण भवन मर्मतमा रकम अभाव भनिरहँदा वर्षेनी आउने करिव तीन करोड रुपैयाँ ‘वालुवामा पानी’ जस्तो त्यसै विलाउँछ ।

 प्रसंग दूतावास प्रवेशद्वारमा जडित अटोमेटिक स्लाइडिङ गेट (विद्युतीय) को हो । करिब २९ हजार पाउण्ड (झण्डै ५० लाख रुपैयाँ) मा जडान भएको रिमोटबाट चल्ने विद्युतीय गेट वर्ष दिन नपुग्दै दुई दुई पटक बिग्रिएर अहिले प्रयोगविहीन छ । रिमोटले नचल्ने भएपछि स्थानीय कर्मचारी सवारी साधन प्राङ्गणमा आउँदा कि बलजफ्ती घचेटेर गेट खोल्छन्, कि हैरानीले खुल्लै छाडिदिन्छन् ।

 तत्कालिन राजदूत डा. सुरेशचन्द्र चालिसेको पालामा गत वर्ष मार्च अप्रिलतिर उक्त गेट लोफ्टस न्यू बिल्ड लिमिटेडले जडान गरेको हो । उक्त कम्पनीले विद्युतीय गेटसहित पानी ट्यांकी, पाँच वटा ट्वाइलेट, सिसिटिभी र रेडियटरहरु मर्मत सम्भार एवं जडान गरेको थियो । एकजना पुराना नेपाली व्यवसायीकै सिफारिशमा उक्त कम्पनीलाई जडान र मर्मत सम्भार जिम्मा दिइएको हो । कमिशनको खेलमा खिया नै नलाग्ने स्टिलका रेडियटर समेत सरसफाइ गरेर त्यतिखेर कम्पनीले आकर्षक रकम लिएको श्रोतको दावी छ ।

 दूतावास श्रोतका अनुसार, कम्पनीले वारेन्टी भनेर दुई पटक पुनः मर्मत गरेपनि गेट फेरि बिग्रिसकेको छ । ‘साह्रै कमसल माल हालिदिएछन्, बिग्रिएर सास्ती छ,’ एक दूतावास कर्मचारी भन्छन्, ‘अब त लोफ्टसले उल्टै सधैं बिगार्छौ भनेर बनाइदिन पनि छाड्यो ।’ त्यति नै खर्चेर पुनः जडान गर्न दूतावाससँग बजेट अभाव रहेको एक कर्मचारीले बताए ।

 कार्यवहाक राजदूत तेजबहादुर क्षेत्रीले गेट बिग्रिएको स्वीकारेपनि नयाँ जडान वा मर्मतबारे केही बोल्न चाहेनन् ।

 धेरै राजनीतिक दलको पहिलो रोजाइमा छ लन्डन दूतावास । दलहरुबीच भागवण्डा नमिल्दा अझै यहाँ राजदूत नियुक्ति हुन बाँकी छ । आउने हरेक राजदूतहरु कुटनीतिक सम्वन्ध विस्तार भन्दा पनि व्यक्तिगत फाइदाकै लागि मरिहत्ते गर्ने गरेको आरोप नेपाली समुदायको छ । ‘नेपाली कार्यक्रममा गएर प्रमुख अतिथि बन्ने मात्र त राजदूतको जिम्मेवारी होइन नि ?’ एकजना पुराना व्यवसायी ध्रुव केसीको आक्रोश थियो, ‘हामी नेपाली समुदाय देश र जनताको हितमा काम गर्ने राजदूत स्वागत गर्न चाहन्छौं ।’

दूतावास कर्मचारीहरुमा भाषिक दक्षताको कमीले पनि बेला बेला कुटनीतिक वृत्तमा नकारात्मक प्रभाव पर्ने गरेको समेत केहीको बुझाइ छ ।