लण्डन । बेलायतका लागि लड्दालड्दै ज्यान गुमाएका गोरखा सैनिकहरुको सम्झनामा बेलायतले यहाँ एक चौतारो निर्माण गरेको छ । स्टाफोर्डसियरस्थित न्याश्नल मेमोरियल आबोरेटममा बनाइएको सो चौतारोको आज बेलायती अधिराजकुमारी (प्रिन्सेस रोयल) इयनले उदघाटन गरेकी छिन्।
प्रिन्सेस इयन बेलायती महारानीकी एक मात्र सुपुत्री हुन् । सो समारोहमा भाग लिन बेलायतका लागि नेपाली कार्यबाहक राजदुत तेजबहादुर क्षेत्रीको पनि सहभागी रहेको थियो।
बेलायतको स्थानीय आइटीभीका अनुसार सो समारोह गोरखाहरुले बेलायतका लागि सेवा गरेको २०० वर्ष पुगेको अवसरमा अर्को वर्ष गर्न गरिन लागेका कैयन कार्यक्रमहरुको एक पूर्व झलक हो ।
सन् १८१५ देखि बेलायती सेवामा भर्ती हुन लागेका गोरखाहरु विभिन्न विश्वयुद्ध र क्षेत्रीय युद्धहरुमा कति मारिए भन्ने बारेमा कसैसाग औपचारिक तथ्यांक छैन ।
गोरखा आन्दोलनकारीहरुले करिब ६० हजार गोरखा मारिएको दाबी गर्दै आएका छन् ।
गोरखाहरुमाथि भेदभाव गरिएको भन्ने आरोप बेलायतलाई अहिले पनि लाग्दै आएको छ र बेलायतको संसदमा दुई साताअघि मात्र यसबारेमा छलफल पनि भएको थियो।
