नेपालको पर्यटन कि आफ्नै प्रवर्धन ?

लन्डन । मह काड्नेले हात चाट्नु पर्छ तर सबै मह खाइदिन त्यति न्यायोचित हुन्न । सन्दर्भ, बिहीवार सांझ लन्डनस्थित नेपाली दूतावासमा आयोजित एउटा पर्यटन प्रवर्धन कार्यक्रमको मञ्च दुरुपयोगबारे हो ।
नेपाली दूतावास र हिमालय ट्राभल म्यागेजिनको संयुक्त आयोजनामा गरिएको कार्यक्रम थियो हिमालय ट्राभल एण्ड टुरिजम इभिनिङ । नेपालको पर्यटनलाई बेलायतस्थित विदेशीमाझ प्रवर्धन गर्नु कार्यक्रमको मुख्य उद्देश्य रहेपनि एउटा आयोजकले पर्यटन होइन, आफ्नै प्रवद्र्धनमा समय खर्च गरिदिंदा त्यसको औचित्य नै घटेको धेरैले महशुस गरे । आयोजक भएकै भरमा हिमालय म्यागेजिनको पत्यार लाग्दो भिडियो हेर्न वाध्य भए अतिथी । पत्रिका प्रकाशन मिति, यसका पृष्ठ, मुल्य, भारत, म्यानमार र ओमानमा यसको वितरण र बेलायतका कुन कुन स्टोरमा पत्रिका उपलव्ध हुन्छ जस्ता सामाग्री भरिएको भिडियोले नेपालको पर्यटन प्रवद्र्धन 
गर्यो भन्ने कमै थिए । पत्रिकामा भारत, म्यानमार र ओमानको पर्यटन सामाग्री 
राखिएकाबारे भिडियो मार्फत गरिएको प्रचार प्रसार नेपाललाई लाभदायक जस्तो पटक्कै लाग्थेन । विज्ञापनदाता एयरवेज प्रतिनिधिले पत्रिकाबारे प्रशंसा गरेको र शुभकामना दिएको सहभागी अतिथीलाई के चासो ? अंग्रेजीमा नियमित पत्रिका प्रकाशनले नेपालको पर्यटन प्रवर्धन गरेपनि मञ्चको सही सदुपयोग नगरिएकामा कतिपय रुष्ट देखिन्थे । भिडियोबाहेक यसका प्रकाशक राजाराम गिरीको मन्तव्य पनि पत्रिकाकै व्याख्यामा केन्द्रित रह्यो ।

कार्यक्रममा कार्यवहाक राजदूत तेजबहादुर क्षेत्रीले भने थोरै समयमा पनि सकारात्मक सन्देश दिए । उनले नेपाल पर्यटनको आकर्षक गन्तव्य रहेको उल्लेख 
गर्दै बेलायतबाट वर्षेनी करिब ४५ हजार पर्यटकले नेपाल भ्रमण गरिरहेको जनाए । भौतिक पूर्वाधार, सडक तथा हवाइ उडान विस्तार, शान्ति सुरक्षा आदि नेपाल सरकारको प्राथमिकता रहेको जनाउंदै क्षेत्रीले सन् २०२० सम्म वर्षेनी २० लाख पर्यटक नेपाल भित्र्याउने सरकारको लक्ष्य समेत सुनाए । गत वर्ष लोन्ली प्लानेटले नेपाललाई विश्वका दश उत्कृष्ट गन्तव्यभित्र राखेबाट पनि नेपाल पर्यटकका लागि आकर्षक गन्तव्य बन्दै गएको बताए । उनले शान्ति प्रक्रियापछि नेपाल विदेशी पर्यटक भित्र्याउने सवालमा सफल भएको पनि चर्चा गरे । क्षेत्रीले नेपालको समसामयिक राजनीतिक परिस्थिति र घट्नाक्रमबारे उल्लेख गर्दै विदेशीलाई नेपाल जान प्रेरित गर्ने सन्देश दिए ।
अपेक्षाभन्दा कम विदेशी सहभागी उक्त कार्यक्रममा उल्टो साइकल यात्री विरेश दाहालसहित अरु दुई साइकल यात्रीलाई समेत परिचय गराइयो र तिनका भिडियो समेत देखाइएको थियो ।

नेपाली वियर मकारा र नेपाली हिमालय वाइन अनि हंग्री यति रेष्टुरेन्टको बफेटले भने अन्तिममा सबै प्रफुल्ल घर फर्किएको हुनुपर्छ ।