स्कटल्याण्डबासीद्वारा युकेबाट अलग हुन अस्वीकार

लण्डन । स्कटल्याण्डबासीले युकेबाट अलग हुन अस्वीकार गरेका छन् ।
विहीबार सम्पन्न जनमत संग्रहको आज बिहान सार्वजनिक मत परिणाम अनुसार ५५ प्रतिशत मत युकेमै रहने पक्षमा खसेको छ भने स्वतन्त्र स्कटल्याण्ड पक्षधरले ४५ प्रतिशत मतमा चित्त बुझाउनु परेको छ ।
निर्वाचन कार्यालयका अनुसार २० लाख १ हजार ९२६ मत स्कटल्याण्ड युकेमै रहनुपर्छ भन्ने पक्षमा परेको छ भने १६ लाख १७ हजार ९८९ मत स्कटल्याण्ड अलग स्वतन्त्र राष्ट्र हुनुपर्छ भन्ने पक्षमा परेको छ ।
अहिलेसम्मकै सबैभन्दा बढी मत ८४.५ प्रतिशत मतदाताले भाग लिएको यस जनमत संग्रहमा झिनो संख्यामा ३ हजार ४२९ मत रद्द हुन पुगेको थियो । यसअघि युकेमा सन् १९५० को आम चुनावमा सबैभन्दा बढी ८३.९ प्रतिशत मत खसेको थियो ।
स्वतन्त्र स्कटल्याण्डका पक्षधरहरुले स्कटल्याण्डका ३२ काउन्सिलमध्ये स्कटल्याण्डका फस्ट मिनिस्टर एलेक्स सालमोण्डको निर्वाचन क्षेत्र डण्डी सिटी, युकेको तेस्रो ठूलो शहर ग्लास्गो, नर्थ ल्याङ्कासायर र वेष्ट डनबार्टनसायर गरी चार वटामा मात्र बहुमत ल्याउन सकेका छन् । स्कटल्याण्डको अति पुरानो एडिनबरा लगायतका बाँकी २८ काउन्सिलमा युकेसित रहन चाहनेहरुले बहुमत प्राप्त गरेका छन् ।
स्वतन्त्र स्कटल्याण्ड पक्षका नेता स्कटल्याण्डका फस्ट मिनिस्टर अलेक्स सालमोण्डले पराजय स्वीकार गरेका छन् र एकताका लागि अपील गरेका छन् । उनले ठूला पार्टीहरुलाई स्कटल्याण्डलाई थप अधिकार दिन पनि आग्रह गरेका छन् ।
यसैगरी, प्रधानमन्त्री डेभिड क्यामरुनले चुनावअघि प्रतिवद्धता व्यक्त गरेको थप अधिकार दिने अठोट व्यक्त गरेका छन् । उनले भनेका छन्, “हामीहरु प्रतिवद्धता गरिएका अधिकार पूर्णरुपमा दिन तयार छौँ ।”
स्कटल्याण्ड छुट्टिनु हुँदैन भन्ने बेटर टुगेदर अभियानका नेता अलिस्टर डार्लिङले स्कटल्याण्डबासीले विभाजन अलावा एकता र अनावश्यक अलगावको साटो सकारात्मक परिवर्तन रोजेको प्रतिक्रिया दिएका छन् ।
मत परिणामपछि खस्कँदै गएको बेलायती पाउण्ड स्टर्लिङको बजार भाउ उकालो लागेको छ भने यसअघि यदि स्कटल्याण्ड स्वतन्त्र भएमा मुख्यालय सार्छौँ भन्ने व्यापारिक प्रतिष्ठानहरुले अब स्कटल्याण्डमै मुख्यालय रहन दिने प्रष्ट पारेका छन् ।