लन्डन । लन्डन साउथ इष्टस्थित केन्टको डार्टफोर्ड बरो काउन्सिलको काउन्सिलर पदका लागि नेपाली मूलका बच्चुकैलाश कैनी उम्मेदवार छानिएका छन् ।
लण्डनस्थित एक अस्पतालका व्यवस्थापक कैनीलाई डार्टफोर्ड निर्वाचन क्षेत्रको लेबर पार्टीको शुक्रबार सम्पन्न बैठकले उम्मेदवारमा अनुमोदन गरेको हो ।
सो काउन्सिलमा एक वर्षपछि ७ मे, २०१५ मा स्थानीय निर्वाचन हँुदैछ ।
काउन्सिलरका अन्य आकांक्षीहरुलाई पछि पार्दै उम्मेदवारमा छानिएपछि कैनीले प्रतिक्रिया दिँदै भने, ‘आफू छानिएको खबरले म निकै हर्षित छु ।’ ‘अब एक वर्षको अवधिमा चुनाव जित्नका लागि मैले निकै मिहिनेत गर्नुपर्नेछ । यो मेरो र पार्टी दुवैका लागि चुनौती पनि हो’ उनले थपे ।
राजनीतिक वातावरणमा हुर्किएका र सानैदेखि राजनीतिप्रति रुचि राख्न थालेको बताउने कैनी अहिले डार्टफोर्ड निर्वाचन क्षेत्र लेबर पार्टीको ट्रेड युनियन लियजन कोअर्डिनेटर र लेबर पार्टीको यही वर्ष सेप्टेम्बरमा हुने महासम्मेलनका लागि डार्टफोर्ड निर्वाचन क्षेत्र समितिको तर्फबाट एक्लो प्रतिनिधि पनि हुन् ।
सन् २००९ देखि युनिसन ट्रेड युनियनको सदस्य र सन् २०१३ देखि लेवर पार्टीको सक्रिय सदस्य कैनी अस्पताल व्यवस्थापन क्षेत्रमा नेपाल र बेलायतमा गरी २२ वर्षदेखि कार्यरत छन् ।
तनहुँको एउटा सामान्य कृषक परिवारमा जन्मिएका कैनी ९ वर्षदेखि बेलायतको सरकारी राष्ट्रिय स्वास्थ्य सेवा (एनएचएस्) मा व्यवस्थापकको रुपमा कार्यरत छन् ।
अहिले युनिभर्सिटी अफ ग्रीनीच, लन्डनबाट अस्पताल व्यवस्थापनमा विद्यावारिधि गर्दै गरेका कैनीका अस्पताल व्यवस्थापन बारेमा दुई पुस्तक र एक कविता संग्रह समेत प्रकाशित छन् ।
