प्राग विश्वविद्यालयमा गोली चल्दा १४ को मृत्यु

प्राग । चेक गणतन्त्रको प्राग विश्वविद्यालयमा एक विद्यार्थीले अन्धाधुन्द गोली प्रहार गरी १४ जनाको हत्या गरेका छन् ।

विहीबार भएको सो घटनामा २५ जना घाइते भएको र गोली हान्ने आफैँले आफैँलाई गोली प्रहार गरेको प्रहरीले जनाएको छ ।

चेकका राष्ट्रपति पेटर पावेलले प्रागको चार्ल्स विश्वविद्यालयमा बिहीबार भएको गोलीबारीबाट आफू “स्तब्ध” भएको बताउनु भएको छ । बिहीबार पेरिसको दुईदिने भ्रमणमा रहनु भएका पावेलले भन्नु भयो- “घटनाबाट स्तब्ध छु । गोलीबारीमा मारिएकाहरूका परिवार र आफन्तहरूप्रति गहिरो दुःख र गहिरो समवेदना प्रकट गर्न चाहन्छु ।”

चेक गणतन्त्रले डिसेम्बर २३ मा राष्ट्रिय शोक मनाउने घोषणा गरेको छ ।
बन्दुकधारी विद्यार्थीले घरमा आफ्ना पिताको हत्या गरी राजधानी आएको आशंका गरिएको छ । उनी क्लाडनो क्षेत्रका बासिन्दा हुन् । बन्दुकधारी यसअघि प्रागमा भएका गोलीकाण्डमा पनि सहभागी भएको हुनसक्ने अनुमान गरिएको छ । उनी पढाइमा तेज र कुनै आपराधिक गतिबिधिमा विगतमा संलग्न नभएको बताइएको छ ।