बेलायती सांसदको हत्या आतंकवादसित जोडिएको प्रहरीको दाबी

लण्डन । लण्डनको महानगरीय प्रहरीले बेलायती सांसद सर डेभिड एमिसको ज्यानै लिने गरी शुक्रबार भएको छुरा प्रहारको घटनालाई आतंकवादसँग जोडिएको घटना बताएको छ ।

बीबीसीका अनुसार सो घटना इस्लामिक अतिवादीसित जोडिएको सम्भावित सूचना पाइएको बताएको छ ।

प्रहरीले घटनामा संलग्न २५ वर्षीय ब्रिटिश युवालाई पक्राउ गरेको छ । स्काइन्यूजका अनुसार उनी सोमालियन पृष्ठभूमिका हुन् । उनलाई एसेक्स प्रहरी कार्यालयमा राखिएको छ ।

प्रहरीले घटनासँग जोडिएको हुनसक्ने आशंकामा लण्डनका दुई घर पनि खानतलासी गरेका छन् ।

करिब ४० वर्षदेखि बेलायती संसदमा प्रतिनिधित्व गर्दै आएका सर डेभिड एमिसको शुक्रबार आफ्नै निर्वाचन क्षेत्रमा हत्या भएको थियो ।  आफ्ना निर्वाचन क्षेत्रका जनतासित भेटघाट गर्दै गरेको बखतमा उनको हत्या भएको हो ।

६९ वर्षीय सर डेभिड जनावरको अधिकारका पक्षधर पनि थिए । उनीप्रति बेलायतका राजकुमार विलियम्स लगायत प्रधानमन्त्री बोरिस जोन्सन,विपक्षी दलका नेता सर कियर स्ट्यामर, सभामुख सर लिण्डसे होयललगायतले श्रद्धान्जलि प्रकट गरेका छन् ।

सर डेभिडका श्रीमती र पाँच छोराछोरी छन् ।