आज बस्ने स्थायी कमिटिमा दुवै अध्यक्षको प्रस्ताव माथि छलफल

काठमाडौं । नेपाल कम्युनिष्ट पार्टी (नेकपा) को स्थायी कमिटी बैठक आइतबार दिउँसो बस्दैछ । पार्टी मुख्यालय धुम्बाराहीमा बस्ने बैठकमा अध्यक्षद्वय केपी शर्मा ओली तथा पुष्पकमल दाहाल ‘प्रचण्ड’ले आफ्नो छुट्टाछुट्टै राजनीतिक प्रस्ताव पेश गर्नुहुनेछ ।

अध्यक्षद्वयको साझा प्रस्ताव तयार हुन नसकेपछि दुवै अध्यक्षबाट फरक फरक प्रस्ताव पेश हुने र त्यसमाथि गम्भीर छलफल हुने कार्यसुचि छ ।

गत कात्तिक २८ गतेदेखि शुरुभएको सचिवालय बैठक मंसिर २० गते सम्पन्न भएपनि त्यसमा दुई अध्यक्षबीचको प्रस्तावमा सहमति बन्न सकेन । दुवै प्रस्ताव आज स्थायी कमिटी बैठकमा प्रस्तुत हुने बताइएको छ । बैठकमा दुवै अध्यक्षले प्रस्ताव प्रस्तुत गर्नुभएपछि अध्ययनका लागि स्थायी कमिटी सदस्यहरुलाई वितरण गरिनेछ । प्रस्ताव प्रस्तुत भएपछि केही समय अध्ययनका लागि बैठक स्थगित हुने नेकपाका नेताहरुको बुझाई छ ।

स्थायी कमिटी बैठक स्थगित भएको बेलामा दुई अध्यक्षबीच सहमतिको प्रयास हुने बताइएको छ । स्थायी कमिटी बैठकमा छलफल पछि समाधानको पहल लिइने नभएमा केन्द्रीय कमिटी बैठकमा पनि छलफल गरी समाधानको पहल गरिने नेताहरुको भनाई छ । केन्द्रिय कमिटीको बैठक २५ गतेका लागि तय गरिएको छ ।