बेलायत घुम्न आएका बस्नेतको हृदयघातबाट निधन, क्षेत्री समाजले गर्‍यो सहयोग

लण्डन । बेलायत घुम्न आएका बेला अकस्मात हृदयघात भई दिवंगत प्रकाश विक्रम वस्नेतको परिवारलाई क्षेत्री समाज बेलायतले आर्थिक सहयोग गरेको छ । समाजका अध्यक्ष राजन क्षेत्रीले शनिबार चन्दाबाट संकलित रकम £१३९१ परिवारलाई हस्तान्तरण गरेका हुन् । 

डाटफोर्ड, केन्ट निवासी पबित्र बिक्रम बस्नेतका बुवा प्रकाश विक्रम बस्नेतको बेलायत भ्रमणका क्रममा अकस्मात हृदयघात हुन गइ आईसीयूमा उपचारकै क्रममा २१ औं दिनमा गत मार्च १५ मा असामयिक निधन भएको थियो ।  

मेडिकल इन्सुरेन्स नभएको र अस्पतालको महँगो खर्च पनि भुक्तानी गर्नुपर्ने भएपछि बस्नेत परिवारले सहयोग याचना गरेको थियो ।  

त्यसपछि समाजका उपाध्यक्ष तथा आपत्कालिन राहत कोषका संयोजक यज्ञ क्षेत्रीको संयोजनमा सहयोग संकलन सुरु गरिएको थियो ।  

बस्नेत निवासमा रकम हस्तान्तरणका क्रममा संयोजक क्षेत्रीले मानवीय बिपत्तिमा समाजको अनुरोध स्वीकारी सहयोग गर्ने सबै सदस्यहरूप्रति आभार प्रकट गरे । सो अवसरमा सल्लाहकार धन क्षेत्री, महासचिब कुमार केसी, कोषाध्यक्ष महेन्द्र केसी, यम भण्डारी, दीपक थापा, सुनिता गौतम, रमेश बास्तोला लगायतको उपस्थिति थियो ।

भर्खरै लण्डन कविता कन्सर्ट-२ बाट विकट सिन्धुपाल्चोक टेकानपुरको बिद्यालयलाई सम्पूर्ण खर्च कटाएर १७ लाख प्रदान गर्न सफल क्षेत्री समाज बेलायत केही बर्षदेखि परोपकारी तथा मानवीय कार्यमा अग्रणी रूपमा देखिएको छ।