पत्रकारका केन्द्रिय नेताहरु लन्डनमा, सहमतिमा जोड

लन्डन । नेपाल पत्रकार महासंघ, बेलायत शाखाको चौंथो अधिवेशनका लागि केन्द्रिय अध्यक्ष गोविन्द आचार्य र महासचिव 
रमेश विष्ट लन्डन आइपुगेका छन् । बुधबार सांझ हिथ्रो उत्रिएका आचार्य र विष्टलाई शाखा अध्यक्ष नरेश खपांगीमगर, सल्लाहकारहरु भगिरथ योगी, नवीन पोखरेल, हरिकुमार गुरुङ काजीसहित पदाधिकारीहरुले स्वागत गरे ।

शाखाको अधिवेशन १९ मे शनिबार अल्डरसटस्थित एम्पायर हलमा हुंदैछ ।

केन्द्रिय अध्यक्ष आचार्यले सर्वसम्मत नयां नेतृत्व चयन गर्न जोड दिएका छन् । शाखाका पूर्व अध्यक्षहरुसंग बेग्लै वार्ता गरेर आचार्यले निर्वाचन भन्दा सर्वसम्मत नेतृत्व चुन्न सुझाए । ‘बेलायत पत्रकारिता र प्रजातन्त्रको जननी पनि मानिन्छ । यो सभ्य समाजमा रहेका पत्रकार साथीहरु मिलेर आउन् भन्ने हामी चाहन्छौं’- आचार्यले भने, ‘नेपालमा नयां सरकार गठनभएसंगै प्रेसमाथि कडाइ गर्ने प्रयास पनि भइरहेका छन् । हामीलाई त्यो चुनौतिसंग लड्न बेलायतका पत्रकारहरुको रचनात्मक सुझाव सल्लाह र सहयोगको खांचो छ ।’

पत्रकारितासंग कुनै ‘साइनो’ नै नभएका व्यक्तिलाई सदस्यता दिलाउन बेलायतबाट बारम्बार दवाव भइरहेको प्रसंग कोट्याउंदै आचार्यले महासंघलाई ठाउं ठाउंमा गएर सदस्यता बांड्दै हिंड्ने खालको सस्तो संगठनका रुपमा नलिन पनि चेतावनी दिए ।

शाखामा नयां नेतृत्वका लागि वर्तमान अध्यक्ष नरेश 
खपाङ्गीमगर र उपाध्यक्ष ध्रुवराज अर्यालले अध्यक्षमा उम्मेदवारी दिएका छन् । वरिष्ठ उपाध्यक्षमा श्याम लुईंटेल र दिनेश परियार, उपाध्यक्षमा खेमराज रानाभाट र लिलामान शेरपुञ्जा तथा महासचिवमा नरेन्द्र बस्नेत, सञ्जयभक्त कंडेल, विमला सेने र खुशी लिम्बु भिडेका छन् ।

त्यसैगरि, सचिवमा शिव भण्डारी र जगन कार्की, कोषाध्यक्षमा पूर्ण गुरुङ र सिद्धार्थविक्रम क्षेत्री प्रतिष्पर्धामा छन् ।