आर्थिक पारदर्शीता र लगनसिलताका लागि मेरो उम्मेदवारी – मुछेत्र गुरुङ

 

लन्डन । एनआरएनए यूके पूर्व अध्यक्ष मुछेत्र गुरुङले गैर आवासीय नेपाली संघ अन्तर्राष्ट्रिय समन्वय परिषदको निर्वाचनमा कोषाध्यक्षको आफ्नो उम्मेदवारी ‘आर्थिक पारदर्शीता’ र लगनसिलताकालागि भएको बताएका छन् ।

आठौं विश्व सम्मेलनका लागि नेपाल उड्नु अघिल्लो दिन उनले संस्था सञ्चालनमा कोष व्यवस्थापन ‘मेरुदण्ड’ हुने बताउंदै आफ्नो ध्यान आर्थिक पारदर्शीतामा केन्द्रित रहने बताए ।

एनआरएनए वर्तमान अध्यक्ष डा. शेष घलेको निकट र विश्वासिलो पात्र ठानिने मुछेत्रले आफ्नो जित सुनिश्चित बनाउन अहिले चुनावी अभियान तीव्र पारिरहेका छन् ।

केही साता अघिमात्र एनआरएनए यूके अध्यक्षको जिम्मेवारी योगकुमार फगामीलाई सुम्पिएका उनको कार्यकाललाई केन्द्रिय अध्यक्ष घलेले उदाहरणीय र सफल भन्दै मुक्तकण्ठले प्रशंसा गरेका थिए । गुरुङको कार्यकालमा बेलायत शाखाले केन्द्रको निर्देशन अनुरुप आर्थिक सहयोग पठाउने देखि प्राकृतिक विपत्तिमा परेका पीडितहरुलाई सहयोग र लाप्राकमा स्वयंसेवक खटाउने कार्य प्रभावकारी रुपमा गरेको थियो ।

सामाजिक अभियन्ता गुरुङ अति मिलनसार र इमान्दार मानिन्छन् । उनलाई आफ्नो कार्यकालमा धमिलिएको एनआरएनए यूके साख स्वच्छ बनाउन महत्वपूर्ण भूमिका निर्वाह गरेको ‘क्रेडिट’ दिइन्छ । गुरुङले बेलायतमा ‘नेपाल हाउस’ को महत्वकांक्षी प्रोजेक्ट ल्याएका थिए ।

तमुधिं यूकेका पूर्व अध्यक्ष गुरुङ तमुधिं यूकेमा कोषाध्यक्ष, उपाध्यक्ष भएर झण्डै ९ वर्ष काम गरिसकेका छन् ।

ब्रिटिश आर्मीमा १८ वर्ष सेवा गरेका गुरुङको सन् १९९० यता बेलायतमा स्थायी बसोवास छ । उनको ट्राभल र प्रोपर्टी व्यवसाय छ ।