कवि पोखरेललाई बिरुवा पुरस्कार

नदी डुल्छ मेरो धरामाझ खास
नदी फुल्छ मेरा गरामा गुरांस
म बांचू र मेरै नदी कल्कलाऊं
म हांसु र मेरै नदीमा हराऊं

विश्व वातावरण दिवसको सन्दर्भमा बेलायतका श्रष्टाहरुले नौलो कार्यक्रम गरे । वातावरण काव्य गोष्ठी र पुरस्कार पनि बिरुवा । लन्डनमा आयोजित वातावरण काव्य गोष्ठीमा उत्कृष्ट रचनाका लागि कवि दुर्गाप्रसाद पोखरेलले पुरस्कार स्वरुप लालीगुरांसको विरुवा प्राप्त गरेका छन् । सो पुरस्कार बेलायतका लागि नेपाली राजदूत डा. दुर्गाबहादुर सुवेदी (दुबसु क्षेत्री) ले प्रदान गरेका हुन् ।

राजदूत सुवेदीले वातावरण दिवसको सन्दर्भमा बेलायतमा रहेका विभिन्न साहित्यिक संस्थाहलाई संयोजन गरेर काव्यगोष्ठी हुनु सारै सराहनीय भएको बताए । बेलायतमा रहेका विभिन्न साहित्यिक संस्थाहरुको सहभागिता रहेको उक्त वातावरण काव्य गोष्ठीमा ४५ जना नेपाली कविहरुले रचनावाचन गरेका थिए । इको कवि विजय हितानले काव्य गोष्ठीबारे जानकारी दिएका थिए ।