अल्ट्रा म्याराथन धाविका राईलाई बेलायतबाट २८ लाख रुपैयांको सम्मान

अल्ट्राम्याराथनका अन्तर्राष्ट्रिय धाविका मिरा राईलाई बिहीबार झापाको दमकमा रु २८ लाखको चेकसहितको सम्मानपत्र हस्तान्तरण गरिँदै । मिरालाई बेलायतमा रहेको सगरमाथा तेक्वान्दो डोजाङलगायतका पाँच वटा संस्थाको पहलमा नगदसहित सम्मान गरिएको हो । तस्बिर ः यज्ञराज आङदेम्बे, झापा, रासस

लन्डन । अल्ट्रा म्याराथनकी अन्तर्राष्ट्रिय धाविका मिरा राईलाई बेलायतवासी नेपालीको तर्फबाट उच्च सम्मान भएको छ । अल्ट्रा म्याराथन खेलमार्फत अन्तर्राष्ट्रिय स्तरमा नै देशको नाम राख्न सफल भएको भन्दै उनलाई २८ लाख  रुपैयांसहित सम्मान गरिएको हो ।

सगरमाथा तेक्वान्दो डोजाङ यूकेको सहकार्यमा बेलायतस्थित आधा दर्जन संघसंस्थाले संकलन गरेको २८ लाख रुपैयां बिहिबार दमकमा एक कार्यक्रम गरी राईलाई सम्मान गरिएको हो । मिरालाई बेलायतस्थित किरांत राई यायोख्खा यूके, जेन मार्शल आर्ट एकेडेमी यूके, भोजपुर समाज यूके र नेपाल युथ अगनाइजेसन यूकेले एकैसाथ सम्मान गरेका हुन् ।

कार्यक्रम संयोजक तथा सगरमाथा तेक्वान्दो डोजाङ यूकेका संस्थापक मास्टर राष्ट्रकुमार राईले मिराले अल्ट्रा म्याराथनमार्फत नेपाल र नेपालीलाई अन्तर्राष्ट्रिय स्तरमा नै चिनाउन गरेको महत्वपूर्ण योगदानको कदर गर्दै सम्मान गरिएको बताएका  छन् ।

भोजपुर सानो दुंगला ९ मा जन्मिएकी मिरा पूर्व जनमुक्ति सेना हुन् । उनी सेना समायोजनका क्रममा उमेर नपुगेका कारण अयोग्य ठहरिएपछि खेल क्षेत्रमा लागेकी थिइन् ।

सन् २०१४ सेप्टेम्बरमा इटालीमा भएको प्रतियोगिता उनको जीवनमा पहिलो अन्तर्राष्ट्रिय स्तरको थियो । फ्रान्स, हङकङ, बेलायत लगायत देशमा सहभागी भएर उपाधि जितिसकेकी उनी हालैमात्र नेशनल जिओग्राफिक च्यानलको एडभेन्चरर्स अफ दि इयर २०१६ उपाधि समेत जित्न सफल भएकी  थिइन् ।