इन्दिरा १ जनवरीमा लन्डन उत्रंदै, पहिलो कार्यक्रम फार्नबोरोमा

लन्डन । बेलायत भ्रमणमा आउन लागेकी गायिका इन्दिरा जोशीको पहिलो कार्यक्रम आगामी २ जनवरीमा फार्नबोरो ओकफार्म कम्युनिटी हलमा हुने तय भएको छ । कार्यक्रममा सहभागी हुन उनी १ जनवरीमा लन्डन आइपुग्दै छिन् । इन्दिराले गोर्खा कल्चरल नाइटमा बेलायतभर १३ वटा ठाउंमा गाउने कार्यक्रम छ ।

नवगठित ब्रिटिश गोर्खा नेपलिज काउन्सिलले कन्सर्ट गर्न लागेको हो ।

यौन हाउभाउले सधैं विवादमा तानिने लोकगायिका ज्योति मगरको भिजा अस्वीकृत भएपछि आयोजकले जोशीलाई झिकाएका हुन् । त्यसो त इन्दिरा पनि सेक्सी फिगरकै कारण चलेको कतिपयको बुझाइ छ । जब उनी स्टेज उत्रन्छिन्, तब दर्शकहरु गीत भन्दा उनको फिगरमै मोहित हुन्छन् । (हेर्नुस् तस्वीर)

इन्दिरालाई नेपालबाटै आउने नृत्य निर्देशक गोविन्द राईले पनि साथ दिने छन् । काउन्सिलकी कलाकार विभाग प्रमुख रोमियन लिम्बुले फार्नबोरोको शो सांझ ५ देखि राती ११ बजेसम्म हुने जनाउंदै सहभागी भइदिन सबैमा आग्रह गरेकी छिन् ।

इन्दिराको क्रेज अहिले नेपालमा अत्यधिक छ । गत सातामात्र उनले विदेशी कलाकारहरुको सहकार्यमा तयार पारेको ‘तिमी र म’ गीतको भिडियो सार्वजनिक गरेकी थिइन् । उक्त गीतमा इन्दिरासंगै हलिउड गायक सिन किङ्सटन र श्रीलंकाली गायक इराजको पनि स्वर समावेश छ ।

गोर्खा कल्चरल नाइट फार्नबोरोपछि ३ मा वेल्स्, ८ मा कोल्चेष्टर, ९ मा रेडिङ, १० मा ग्रेज, १६ मा आसफोर्ड, १७ मा विनचेष्टर, २३ मा स्वीन्डन, २४ मा लन्डन, २९ मा ननिटन, ३० मा बेजिङस्टोक र ३१ मा क्याट्रिकमा हुने आयोजकले जनाएका छन् ।