आन्दोलनको स्वरुप परिवर्तन गरेर वार्तामा आऊ ः गृहमन्त्री बस्नेत

भक्तपर, २४ कात्तिक । गृहमन्त्री शक्ति बस्नेतले आन्दोलनरत मधेसी मोर्चाको मागप्रति सरकार गम्भीर भएको बताउनु भएको छ ।

आज साँझ भक्तपुरको व्यासीमा इन्द्रेणी सांस्कृतिक समाज ‘इसास’ले आयोजना गरेको सांस्कृतिक कार्यक्रममा उहाँले मोर्चाको मागप्रति सरकार गम्भीर भएकाले वार्तामा बस्न आग्रह गर्नुभएको हो ।

उहाँले सरकारसँग वार्तामा बस्दा आन्दोलन गर्नैपर्ने भए पनि नाकाबन्दी खोल्नेगरी आन्दोलनको स्वरुप परिवर्तन गरेर वार्तामा बस्न उहाँले आग्रह गर्नुभयो ।

गृहमन्त्री बस्नेतले भन्नुभयो—“अरूको उक्साहटमा आमजनतालाई दुःख दिने आन्दोलन छाडेर वार्तामा बस्नुहोस्, आन्दोलनरत पक्षको माग पूरा गर्ने सवालमा सरकार गम्भीर र संवेदशनशील छ ।”

हिजोको मन्त्रिपरिषद् बैठकले आन्दोलनरत मोर्चालाई वार्ताका लागि औपचारिक रुपमै आह्वान गर्ने र वार्तामा आन्दोलन पक्षको मागप्रति सरकार लचक हुने निर्णय गरेको उहाँले बताउनुभयो ।

कार्यक्रममा नृत्य प्रशिक्षकद्वय महेश्वर कारजी, सीताराम होना र बालाखु गणेश भजन मण्डलका गुरु हरिभक्त सुवाललाई सम्मान गरिएको थियो ।

तुलसीनारायण व्यञ्जूको सभापतित्वमा सम्पन्न कार्यक्रमको बेपत्ता परिवारको आमा ईन्द्रकेशरी श्रेष्ठले उद्घाटन भएको थियो भने पूर्वसभासद् सत्यलाल मूल, युवानेता सुनिल बाँसुलगायतले नाकाबन्दी मानवअधिकार विरोधी कार्य भएको बताउनुभएको थियो ।