स्वर्ग जाने भरयाङ हैन, नेपाल फेर्ने बाटो बनाएरै छोड्छु ः प्रम ओली

काठमाडौँ, २१ कात्तिक । प्रधानमन्त्री केपी शर्मा ओलीले अहिलेको परिस्थितिमा सामाजिक सद्भावका साथ राष्ट्रिय एकता कायम गर्न जरुरी रहेको बताएका छन् ।

हिमशिखर टेलिभिजनको काठमाडौँ कर्पोरेट अफिसको आज यहाँ उद्घाटन गर्दै उनले नयाँ संविधानले पनि सामाजिक असमानता र विभेद अन्त्य गरी समान अवसर प्रदान गर्ने व्यवस्था गरेको भन्दै त्यसलाई व्यवहारमा लागू गर्न सबैको भूमिका चाहिने बताए ।

प्रधानमन्त्री ओलीले विविधतायुक्त मुलुकमा जुन जाति या भाषी जहाँ बसे पनि हामी सबै नेपाली भएकाले अहिलेको समस्या साझा समस्या हो भन्दै प्राकृतिक सम्पदा र विविधताले भरिएको मुलुक नेपालको संवृद्धिका लागि एकजुट भएर लाग्नुपर्ने बताए ।

अब मुलुकलाई सकेसम्म आत्मनिर्भर बनाउने बाटोतर्फ अगाडि बढ्नुपर्ने आवश्यकता औँल्याउँदै उनले एक वर्षभित्र नेपाललाई विद्युत्भार कटौती मुक्त बनाउने उद्घोष गरे ।

“अब धेरै समय छैन, त्यसैकारण छिटो गर्नुपर्छ, स्वर्ग जाने भरयाङ बनाउने हैन, नेपाल फेर्ने बाटो चाहिँ बनाएरै छोड्छु । छोटो समयमा हामी केही गर्छौं । कृषिको आधुनिकीकरण र व्यवसायीकरण, पशुजन्य व्यवसाय वृद्धि, कपडाका लागि कपासको खेती, टेक्सटायल उद्योग स्थापनालगायतका कामलाई अघि बढाई औद्योगिकीकरण र आधुनिकीकरण गरी मुलुकलाई आत्मनिर्भर बनाउँदै जान्छौँ” –उनले भने ।

प्रधानमन्त्रीले अब हामीले ग्यासका चुलाभन्दा पनि बिजुलीका चुलातर्फ लाग्नुपर्छ, भन्दै मुलुकलाई एक वर्षभित्र विद्युत्भार कटौती मुक्त बनाएरै छाड्ने प्रतिबद्धता जनाए ।

उनले भने– “इन्धनको विकल्पमा काठमाडौँ उपत्यकामा भरपर्दो ढङ्गले अध्ययन गरी मेट्रो रेल, ट्रली बस, विद्युतीय सवारीसाधन सञ्चालन गर्नुपर्छ । हामी अब पूर्व–पश्चिम राजमार्गलाई चौडा गरी छ लेनको सडक बनाउँछौँ, चतरादेखि सिन्धुलीसम्म अर्को सडक बनाउँछौँ, फिल्मसिटी, आइटी सिटी र मोडर्न सिटी मस्र्याङ्दी, तनहुँ र लमजुङको आसपास बनाउँछौँ, त्यतिमात्र होइन उत्तरी क्षेत्रका सबै नाका खुलाउँछौँ ।”
प्रधानमन्त्री ओलीले मध्यपहाडी राजमार्गलाई बढाई काठमाडौँ आसपासका जिल्लामा तरकारी खेतीको पकेट क्षेत्रका रूपमा विकास गरी, फलफूल खेती र नयाँ बस्तीको विकास गर्नेतर्फ उन्मुख हुने पनि बताए ।
नेकपा (एमाले) का अध्यक्ष पनि रहनु भएका प्रधानमन्त्री ओलीले अहिले अर्कै प्रकारको परिस्थिति रहेको र यो कठिनाइपूर्ण अवस्थामा नेपाली जनताले देखाएको देशभक्तिप्रति आभार प्रकट गर्दै जनताले पाएको दुःखकष्टबाट आफू मर्माहत भएको बताए ।
“हामी भारत विरोधी होइनौँ, नेपाल भारत विरोधी होइन, सरकार भारतको विरोधी होइन त्यस्तो सोच्न पनि सकिन्न । म भारतीय सरकारलाई आग्रह गर्न चाहन्छु, यति आत्मीय र मैत्रीपूर्ण भावना राख्ने नेपाली जनताको मर्मलाई तपार्इंहरूले बुझिदिनुस्, नेपाललाई ग्यास र इन्धन उपलब्ध गराइदिनुस् । भारतीय बुद्धिजीवी र त्यहाँका सञ्चार माध्यमलाई धन्यवाद दिन्छु, जसले नेपालीको पीडाप्रति सद्भाव देखाएर मानवीय भावना देखाउनुभएको छ” – उनले भने ।

प्रधानमन्त्री ओलीले तराईको नाकाबन्दीले मुलुकको अर्थतन्त्रलाई बर्बाद बनाएको र यसले कसैलाई पनि फाइदा नहुने भन्दै आन्दोलनकारीका जायज मागलाई सम्बोधन गर्न सरकार लचिलो रहेकाले सहमतिमा आउन आग्रह गरे ।
उनले अहिले मुलुकमा देखिएको समस्या समाधान गर्न तीन प्रमुख राजनीतिक दल मिलेर अघि बढ्नुको विकल्प नरहेको पनि बताए ।
एक फरक प्रसङ्गमा प्रधानमन्त्री ओलीले प्रेस तथा प्रकाशन स्वतन्त्रताको हकको प्रयोग गरी सञ्चारमाध्यमले स्वतन्त्र, सुरक्षित र जिम्मेवार पत्रकारिताको भूमिका निर्वाह गर्नुपर्नेमा जोड दिए ।
कार्यक्रममा सूचना तथा सञ्चार प्रविधि मन्त्री शेरधन राईले नयाँ संविधानले सबै जाति, समुदाय र वर्गको हक अधिकारलाई सम्बोधन गरेकाले यसको पूर्ण कार्यान्वयनका लागि सबै एकताबद्ध भएर लाग्नुपर्ने खाँचो औँल्याए ।
“हाम्रो संविधान नमुना संविधान हो, संविधानसभाको अत्यधिक ठूलो समर्थन पाएको र संसारले समर्थन गरेको संविधान जारी भएको छ, यसलाई अक्षरशः कार्यान्वयन गरेर परिवर्तनको फल जनतालाई चखाउने महत्वपूर्ण घडीमा छौँ, अर्थात देशलाई विकास र समृद्धिको गतिमा लगेर जनतालाई सम्पन्न बनाउने महत्वपूर्ण समयमा हामी छौँ ”, मन्त्री राईले भने ।
“म सञ्चारकर्मीलाई आग्रह गर्न चाहन्छु, संविधानको गुदी, मर्मलाई बुझी आत्मसात् गरेर राष्ट्रिय एकता, सामाजिक सद्भाव र मुलुकको सार्वभौमिकतालाई अक्षुण्ण राख्दै छिटफुट रूपमा देखापरेका गलत भावना, विचार र भड्काउवादी चिन्तनलाई निर्ममतापूर्वक प्रहार गरी जनताको सपनालाई साकार पार्नेगरी सञ्चारमाध्यमले भूमिका खेल्नुपर्छ” – उनले भने ।

नेपाली काँग्रेसका केन्द्रीय सदस्य केशवकुमार बुढाथोकीले संविधान जारी गर्न सहमति गरेका राजनीतिक शक्तिहरू फेरि पनि एक ठाउँमा उभिएर संविधानको व्यावहारिक कार्यान्वयनतर्फ एकजुट हुनुपर्नेमा जोड दिए ।
टेलिभिजनका अध्यक्ष ध्रुव न्यौपाने र प्रबन्ध निर्देशक रामकुमार बस्नेतले हिमशिखर टेलिभिजन विविध चुनौतीलाई पार गर्दै राष्ट्रिय प्रसारणको पहँुचमा पुगेको भन्दै अझ जिम्मेवारीका साथ अघि बढ्ने बताए ।

कार्यक्रममा कानुनमन्त्री अग्नि खरेल, विज्ञान प्रविधि तथा वातावरणमन्त्री विश्वेन्द्र पासवानको पनि उपस्थिति थियो । विसं २०६७ कात्तिक १९ गते आफ्नो प्रसारण शुभारम्भ गरेको हिमशिखर टेलिभिजनले २०७१ फागुन १८ गतेदेखि राष्ट्रव्यापी प्रसारण सुरु गरेको थियो ।